Kryetari i Aleancës për Ardhmërinë e Kosovës (AAK), Ramush Haradinaj, të martën është takuar me ish ushtarakun amerikan, hulumtuesin shkencor si dhe njohësin e çështjeve të sigurisë, Dan Little.
Këtë e ka bërë të ditur Haradinaj përmes një postimi në rrjetin social “Facebook”, duke thënë se Shtetet e Bashkuara të Amerikës (SHBA) janë aleati kryesor i Kosovës.
“Shtetet e Bashkuara të Amerikës janë aleati ynë kryesor strategjik dhe Republika e Kosovës është e vendosur për bashkëpunim bilateral në të gjitha fushat“, ka shkruar Haradinaj.
Tutje, ai ka njoftuar për takimin duke sqaruar edhe bisedat kyçe që janë zhvilluar gjatë këtij takimi.
“Takim miqësor me Dan Little, ish ushtarak amerikan, hulumtues shkencor dhe njohës i çështjeve të sigurisë. Biseduam për temat e sigurisë dhe mundësitë e bashkëpunimit dhe investimeve për sigurinë e Kosovës”, deklaroi Haradinaj.
Ndryshe, më 31 dhjetor, i ngarkuari me punë në Ambasadën e Shteteve të Bashkuara të Amerikës në Prishtinë, Nicholas Giacobbe dhe bashkëpunëtorët e tij amerikanë në Kosovë, përmes një video-mesazhi kanë uruar Vitin e Ri 2022 dhe kanë dhënë mesazhet e tyre.
Përmes Twitter-it, Giacobbe është shprehur se viti 2021 ka provuar se partneriteti në mes të Amerikës dhe Kosovës është më i fortë se kurrë.
“Në vitin 2021 u shfaq këmbëngulja dhe qëndrueshmëria e Kosovës dhe kosovarëve. Viti 2021 provoi gjithashtu se partneriteti midis SHBA-së dhe Kosovës është më i fortë se kurrë. Këtu janë vetëm disa shembuj të përparimit që kemi bërë së bashku këtë vit. Gëzuar Vitin e Ri!”, ka shkruar Giacobbe.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
