Google, Microsoft dhe OpenAI formojnë një organ për të rregulluar zhvillimin e AI-së

Katër nga kompanitë më me ndikim në inteligjencën artificiale (AI) kanë njoftuar formimin e një organi të industrisë për të mbikëqyrur zhvillimin e sigurt të modeleve më të avancuara.

Forumi i Modelit Frontier është formuar nga zhvilluesi i ChatGPT OpenAI, Anthropic, Microsoft dhe Google, pronar i DeepMind me bazë në Mbretërinë e Bashkuar.

Grupi ka bërë me dije se do të përqendrohet në zhvillimin e sigurt dhe të përgjegjshëm të modeleve të AI-së, duke iu referuar teknologjisë edhe më të avancuar se shembujt e disponueshëm.

“Kompanitë që krijojnë teknologjinë AI kanë përgjegjësinë për të siguruar që ajo të jetë e sigurt dhe të mbetet nën kontrollin e njeriut”, ka thënë Brad Smith, presidenti i Microsoft.

“Kjo nismë është një hap jetik për të bashkuar sektorin e teknologjisë në avancimin e AI-së me përgjegjësi dhe trajtimin e sfidave në mënyrë që të përfitojë gjithë njerëzimi”.

Kurse anëtarët e forumit kanë thënë se objektivat e tyre kryesore ishin promovimi i kërkimit në sigurinë e AI-së, si zhvillimi i standardeve për vlerësimin e modeleve; inkurajimi i vendosjes së përgjegjshme të modeleve të avancuara; diskutimi i rreziqeve të besimit dhe sigurisë në AI me politikanët dhe akademikët.

Po ashtu edhe duke ndihmuar në zhvillimin e përdorimeve pozitive të AI-së si luftimi i krizës klimatike dhe zbulimi i kancerit.

Ata kanë thënë gjithashtu se anëtarësimi i grupit ishte i hapur për organizatat që zhvillojnë modele kufitare, të cilat përkufizohen si “modele të mësimit të makinerive në shkallë të gjerë që tejkalojnë aftësitë aktualisht të pranishme në modelet më të avancuara ekzistuese dhe mund të kryejnë një shumëllojshmëri të gjerë detyrash”.

Njoftimi vjen pasi lëvizjet për të rregulluar teknologjinë po rriten me ritëm të shpejtë.

Të premten, kompanitë e teknologjisë ranë dakord për masat e reja mbrojtëse të AI-së pas një takimi në Shtëpinë e Bardhë me Joe Biden.

Angazhimet nga takimi përfshinin vendosjen e përmbajtjes së AI-së për ta bërë më të lehtë zbulimin e materialeve mashtruese siç janë falsifikimet dhe lejimin e ekspertëve të pavarur të testojnë modelet e AI-së.

Njoftimi i Shtëpisë së Bardhë u prit me skepticizëm nga disa aktivistë, të cilët kanë thënë se industria e teknologjisë kishte një histori të dështimit për t’iu përmbajtur premtimeve për vetërregullim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.