Financial Times: Shqipëria e mbërthyer nga skandali i spiunazhit të bandave kriminale

Shqipëria e mbërthyer nga skandali i spiunazhit të bandave kriminale.

Kështu shkruan gazeta britanike “Financial Times” teksa sjell një raportim për çmonitim e 500 kamerave të paligjshme në disa nga qytetet kryesore të vendit.

Për FT-në, ky është një skandal që nxjerr në pah fuqinë e rrjeteve kriminale në kombin e vogël ballkanik.

Kamerat, rreth gjysma e të cilave ishin montuar në kryeqytetin e vendit, u zbuluan gjatë një hetimi të nxitur nga një mjet shpërthyes i vendosur pranë shtëpisë së një oficeri policie në qytetin verior shqiptar të Shkodrës.

“Ndikimi i bandave kriminale është përmendur ndër arsyet kryesore që shqiptarët të largohen nga vendi i tyre dhe të shpërngulen në vende të tjera evropiane, përfshirë Britaninë e Madhe”, shkruhet më tej në artikull.

Vetë Policia pranoi një ditë më parë se kamerat e vendosura në shtylla elektrike dhe në rrugë ishin për të mbledhur informacione për qëllime kriminale – e të vendosura nga persona apo grupe kriminale që donin të kishin në kontroll lëvizjet e Policisë.

Kryeministri i vendit, Edi Rama tha se operacioni policor ishte “pak si një situatë Catch-22 pasi akuzohemi se nuk kemi marrë masa dhe akuzohemi gjithashtu kur marrim masa”.

“Fakti që policia veproi për këtë çështje, problem prej dekadash, do të thotë se qeveria është e prirur dhe e fokusuar në luftimin e krimit të organizuar”, tha Rama.

Ai shtoi se jo të gjitha kamerat ishin të lidhura me rrjetet kriminale dhe se “disa ishin për përdorim individual, megjithëse jo të ligjshëm”.

FT-ja sjell edhe deklaratën e ish-ministrit të Jashtëm dhe të Drejtësisë, Aldo Bumçi, i cili u shpreh se grupet kriminale kishin ndërtuar një rrjet global të trafikut të narkotikëve dhe po pastronin paratë në Tiranë.

Kryeministri Edi Rama e kundërshtoi këtë duke thënë se “kultivimi i kanabisit ka rënë në mënyrë drastike dhe operacionet e suksesshme policore në bashkëpunim me partnerët ndërkombëtarë flasin për rritjen e efektivitetit në luftimin e krimit ndërkombëtar dhe atij të brendshëm”.

Vitin e kaluar, Komisioni Evropian kritikoi Shqipërinë, një kandidate në BE, për një ligj të propozuar që ofron amnisti për depozitat deri në 2 milionë euro në bankat shqiptare pa penalitete, duke tatuar transfertat me një normë deri në 10 për qind.

Një raport i departamentit të shtetit i publikuar vitin e kaluar tha se Tirana duhet të vazhdojë përpjekjet për reformën në drejtësi, të forcojë rregulloret dhe mbikëqyrjen kundër pastrimit të parave dhe të punojë për të gërryer ndikimin e krimit të organizuar.

“Krimi i dhunshëm në Shqipëri shoqërohet shpesh me krimin e organizuar. Gjyqtarët, prokurorët, policia dhe gazetarët kanë qenë subjekt i frikësimit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.