Evangjelia Veli shkruan historinë, shpallet kampione e Evropës

Peshëngritësja shqiptare Evangjelia Veli ka kurorëzuar ëndrrën e saj duke u shpallur kampione e Evropës deri në peshën 55 kilogramë për femra.

Ky është një kulmim historik për sportin shqiptar sa i takon përfaqësimit të sportisteve tona.

Veli mori medalje ari në stilin “shkëputje” dhe në dygarësh (208 kilogramë), kurse në shtytje mori medalje argjendi.

Shtangistja shqiptare ngriti 95 kilogramë në stilin shkëputje dhe u rendit e para.

Në shtytje ajo ngriti 113 kg, po aq sa një sportiste tjetër e cila përfitoi nga rregullorja për të marrë medaljen e artë.

“Unë dua të bëhem kampione e ardhshme evropiane dhe të fitoj një medalje olimpike, (që jam i sigurt se është ëndrra e çdo sportisti elitar) veçanërisht pasi vendi im nuk ka marrë ende asnjë medalje olimpike”, deklaronte Veli në vitin 2018.

Më herët, erdhën dhe reagimet e para për këtë sukses historik.

Fillimisht, ishte ministrja e Arsimit dhe Sporteve, Evis Kushi dhe më pas kryeministri Edi Rama që përgëzuan peshëngritësen shqiptare.

Përfaqësimet e para

Peshëngritësja shqiptare përfaqësoi Shqipërinë në muajin dhjetor në Kampionatin Botëror të Peshëngritjes, duke e përfunduar garën në vendin e katërt.

Veli konkuroi në stilin e shkëputjes sërish për peshat deri në 55 kilogramë.

Në kampionatin, i cili po zhvillohej në Tashkent të Uzbekistanit, ajo ngriti 86 dhe 88 kilogramë në dy provat e para.

Në të tretën, Veli nuk mundi të ngrinte 91 kg.

Në Kampionatin Evropian të Peshëngritjes, i cili u zhvillua në Rusi gjatë muajit prill, Veli arriti të merrte medaljen e bronztë.

Evangjelia Veli arriti të renditej e treta në stilin e shkëputjes.

Gjatë vitit 2021 ajo kishte paralajmëruar për largimin e saj nga skena e peshëngritjes.

Një vit më pas ajo u gjend e përlotur para publikut të saj si Kampione e Evropës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.