Presidenti i Turqisë, Recep Tayyip Erdogan, në konferencën e përbashkët për shtyp deklaroi se përqasja e NATO-s është më e rëndësishme se ajo e Bashkimit Evropian.
Kjo, pasi BE-ja ende nuk ka hapur kapitujt e parë me të dyja vendet.
Ndërsa, referuar NATO-s, Erdogan kujtoi që Turqia mbetet një nga anëtaret më të fuqishme të saj.
Fillimisht, kreu i shtetit turk nënvizoi se mbledhja e përbashkët e ministrave të të dy vendeve do të bëhet në gjysmën e parë të vitit.
Për numrin një të presidencës turke, takimi i 17 janarit ishte një ravijëzim i marrëdhënieve të shkëlqyera në nivele të larta.
“Jemi investitori më i madh në Shqipëri me 3.5 miliardë dollarë investime. Besoj që këto shifra do të rriten më shumë me ndihmën e autoriteteve shqiptare”, shtoi kreu i qeverisë turke.
Në theksin e fjalës së Erdogan-it ishte dhe lufta e përbashkët ndaj organizatës terroriste FETO.
“Të merren hapa më të shpejta kundër FETO-s në Shqipëri”, ishte thirrja e numrit një të presidencës turke.
Erdogan pati dhe këshilla për kryeministrin Rama, duke i kujtuar se turizmi dhe kultura janë një ministri e vetme në Turqi.
Rindërtimin e xhamisë së Ethem Beut, kreu i qeverisë turke e konsideroi një vlerë të rëndësishme të trashëgimisë kulturore.
Marrëveshjet
Palët nënshkruan më herët shtatë marrëveshje të reja bashkëpunimi mes tyre.
Fillimisht u firmos një protokoll bashkëpunimi ndërmjet drejtorisë së arkivit shtetëror të Turqisë dhe drejtorisë se përgjithshme të arkivit të Shqipërisë.
E dyta përfshinte një memorandum mirëkuptimi për bashkëpunimin në fushën e rinisë dhe sporteve ndërmjet dy ministrive të dy vendeve.
Marrëveshja e tretë është bashkëpunimi ndërmjet agjencisë Anadolu dhe agjencisë telegrafike shqiptar.
Në radhë të katërt u firmos një memorandum mirëkuptimi për bashkëpunimin në fushën e trajnimeve për zbatimin e ligjit ndërmjet qeverisë turke dhe asaj shqiptare.
Memorandum mirëkuptimi u nënshkrua edhe në fushën e menaxhimit të fatkeqësive ndërmjet drejtorisë se emergjencave dhe ministrisë së brendshme turke.
Marrëveshja e radhës ishte një memorandum mirëkuptimi ndërmjet ministrisë së jashtme të Turqisë dhe diplomacisë shqiptare për bashkëpunimin ne fushën e protokollit.
E fundit marrëveshje përfshinte një protokoll bashkëpunimi ndërmjet Drejtorisë se Përgjithshme Shtetërore të Operës dhe Baletit dhe ministrisë së Kulturës dhe Turizmit të Turqisë.
Ndërtimi i vizitës
Erdogan mbërriti në Shqipëri mëngjesin e 17 janarit.
Kreu i shtetit turk mori pjesë fillimisht në ceremoninë e shpërndarjes së çelësave të banesave në Kurbin.
Këto të fundit u ndërtuan me financimin e qeverisë turke.
Pas tërmetit të 26 nëntorit 2019 që tronditi vendin, autoritetet turke u mobilizuan për të ndihmuar Shqipërinë.
Në fjalën e tij përshëndetëse, presidenti turk e konsideroi gëzimin e shqiptarëve edhe si gëzimin e tij.
“Vëllai i qëndron pranë vëllait, kur ka nevojë dhe jo kur thirret”, ravijëzoi Erdogan.
Një nga mesazhet e shpërndara prej tij ishte zgjatja përgjithmonë e miqësisë mes Turqisë dhe Shqipërisë.
“Ne ndajmë historinë e përbashkët, vlerat e qytetërimeve. Gjatë pandemisë COVID kemi ndihmuar vëllezërit në nevojë”, shtoi Erdogan.
Lidhur me angazhimin e qeverisë turke, kreu i shtetit turk shpreson që shtëpitë e ndërtuara të jenë të favorshme për qytetarët e Laçit.
Kostoja e 522 banesave ishte rreth 42 milionë euro.
Në përmbyllje të fjalës, numri një i presidencës turke u vlerësua me titullin “Qytetar Nderi i Kurbinit”.
Kjo, si shenjë falënderimi për përkushtimin e tij ndaj kauzës që preku shqiptarët.
Erdogan u vlerësua edhe për mbajtjen e fjalës mbi premtimin e zonës rezidenciale.
Ky vlerësim iu dorëzua nga kryetarja e Bashkisë së Kurbinit, Majlinda Cara.
Në vijim, po në nder të tij, u zhvillua edhe ceremonia e emërtimit të sheshit në qytetin e Laçit.
Duke filluar nga 19 janari, ai do të mbajë emrin sheshi “Erdogan”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Aksioni i Frontex në Ballkan jep efekt, bien drastikisht kalimet e jashtëligjshme
-
Mbi 14 milionë turistë priten këtë vit, Balla: Policia e Shtetit i ka marrë të gjitha masat
-
Ose të dëgjojë SHBA-të ose të përgatitet për përshkallëzim – zgjedhja i takon Izraelit
-
Kurti për vizitën dy ditore në Gjermani: Kryefjala e vizitës ishte rëndësia e anëtarësimit të Kosovës në KiE