Edi Rama thërret Grubin në telefon, ai i shpjegon se pa Taravarin në zgjedhje Osmani do ishte në balotazh

Kryeministri shqiptar, Edi Rama, ka zhvilluar një bisedë telefonike me Artan Grubin nga Bashkimit Demokratik për Integrim, ku edhe është informuar për rezultatet e para pas votimeve presidenciale të zhvilluara në Maqedoninë e Veriut.

Përmes një videoje të shpërndarë në media sociale gjerësisht, duket Grubi teksa flet me Ramën dhe i shpjegon se si kanë shkuar votimet dhe si janë rezultatet.

Grubi i ka treguar Ramës se Osmani ka marrë votat e treta më së shumti në rang kombëtar, ku ka fituar në qendrat kryesore shqiptare përballë Arben Taravarit të VLEN.

Mbi këtë të fundit, i ka thënë edhe se të mos kishte kandiduar dhe të ishin bashkuar votat e shqiptarëve, Osmani do të ishte në balotazh për të qenë Presidenti i ardhshëm i Maqedonisë së Veriut.

Megjithatë, në video, Grubi duket tejet i kënaqur për rezultatin dhe e ka falënderuar kryeministrin shqiptar për interesimin e treguar lidhur me shqiptarët në zgjedhjet e vendit fqinj.

Po ashtu, në fund, i ka treguar edhe pozitën e Stevo Pendarovskit, presidentit aktual maqedonas, i cili projektohet të shkojë në balotazh me Gordana Siljanovska Davkovan e VMRO-DPMNE.

Ajo i udhëheq votimet me 80% të kutive të numëruara, me 40.05% të votave.

Pendarovski ka marrë 19.55%. Osmani 14.15%. Taravari 9.99%. Dimitrievski 8.47%. Cvetkovska 4.30% dhe e mbyll Jakimovki me vetëm 0.72%.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.