Në vend të këmishës me kollare, deputeti i Lëvizjes Vetëvendosje, Fitim Haziri, ka zgjedhur që në sallën e Kuvendit të shkojë i veshur me fanellë futbolli.
Haziri, deputeti nga Podujeva, u shfaq me numrin 4 të “KF Llapit”, që këtë të enjte, me fillim në orën 20:00 ndeshet në finalen e Kupës së Kosovës me Dritën e Gjilanit.
“Kam dashtë me ja dhanë një përkrahje Llapit prej Kuvendit Kosovës”, tha Haziri për Albanian Post, kur u pyet për paraqitjen prej futbollisti në Kuvend.
“Jam i Podujevës dhe e përkrahi klubin tim prej nga vij. Përderisa deputetët tjerë përkrahin klubin e tyre nga Gjilani edhe unë do ta bëj”, shtoi deputeti i VV-së.
Kur ai u pyet se a ka pasur deputetë të tjerë të veshur me fanella, Haziri tha: “Më lindi ideja aty për aty edhe vendosa që me veshjen e fanellës ta përkrahi klubin tim”.
Kujtojmë që finalja e Kupës së Kosovës mes Llapit dhe Dritës do të zhvillohet mbrëmjen e së enjtes me fillim nga ora 20:00.
Përndryshe, Llapi e ka fituar edhe vitin e kaluar këtë trofe.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
