Ben-Meir rendit “katër hapa” që duhet t’i ndjekë Kurti dhe BE-ja: Kjo do t’i japë fund ngërçit Kosovë-Serbi

Alon Ben-Meir, analist politik, konsulent dhe kolumnist i shumë medieve ndërkombëtare, ka listuar “katër hapa”, të cilët, sipas tij, kryeministri i Kosovës, Albin Kurti, duhet t’u përmbahet për të ndryshuar trajektoren e Kosovës, posaçërisht në marrëdhëniet midis bashkësisë së organizuar ndërkombëtare dhe dialogun për normalizimin e marrëdhënieve me Serbinë.

Njohësi i zhvillimeve socio-politike në Ballkanin Perëndimor, në një shkrim autorial të publikuar në portalin pan-evropian “Emerging Europe“, ka thënë se së pari, kreu i ekzekutivit kosovar duhet të punojë së bashku me Bashkimin Evropian (BE) dhe t’i caktojë zgjedhjet e reja në komunat me shumicë serbe – Mitrovicë e Veriut, Leposaviq, Zubin Potok dhe Zveçan.

“Kurti duhet ta bëjë të qartë herë pas here se ai e konsideron çdo person brenda kufijve të vendit sikurse kosovar dhe të përqafojë serbët etnikë sikurse çdo shqiptar kosovar tjetër, gjë që është në pajtueshmëri dhe kërkohet nga karta e BE-së”, ka shkruar Ben-Meir në tekstin e tij autorial në lidhje me rrjedhën e tensionuar në raportet Kosovë-Serbi.

Së dyti, sipas profesorit amerikan, kryeministri Kurti duhet të fillojë menjëherë themelimin e Asociacionit të Komunave me Shumicë Serbe, pavarësisht presidentit të Serbisë, Aleksandër Vuçiç, derisa vendet kryesore të BE-së – Gjermania, Franca dhe Itali –  duhet të punojnë për të bindur Greqinë, Rumaninë, Qipron, Sllovakinë dhe Spanjën, që të njohin Kosovën.

Hapi i tretë në këtë drejtim, sipas analistit amerikan, duhet të jetë pranimi i planit franko-gjerman ashtu siç është dhe kreu i ekzekutivit kosovar duhet të veprojë drejt zbatimin e tij menjëherë, porse edhe Serbia duhet të ndjekë shembullin. Në këmbim të kësaj, ka pohuar Ben-Meir, shtetet anëtare të BE-së duhet ta shpërblejë Kosovën duke ia dhënë statusin e vendit kandidat.

“Tre hapat e mësipërm do të ushtrojnë presion të jashtëzakonshëm mbi Vuçiçin për të ndryshuar qasjen e tij, sepse gjëja e fundit që ai dëshiron të shohë është përparimi i Kosovës drejt integrimit derisa ai të mbetet pas”, ka shkruar ndër të tjera analisti amerikan në artikullin e titulluar – Kurti dhe Vuçiç: Çifti i çuditshëm që e bënë të çuditshmen shkencë.

Së katërti, ka shkruar më tej Ben-Meir, kryeministri Kurti duhet të fokusohet në forcimin e ekonomisë së Kosovës, eliminimin e korrupsionit që do të inkurajonte investimet e huaja, krijimin e mundësive të punës për të diplomuarit për të parandaluar “ikjen e trurit” dhe përmirësimin e kujdesit shëndetësor e sistemit arsimor.

“Ndërmjetësimi i BE-së mes Serbisë dhe Kosovës ka goditur një mur me tulla. Duke mos kushtëzuar më integrimin e Serbisë dhe Kosovës në BE nëse Serbia nuk e njeh pavarësinë e Kosovës, kjo do të ndryshojë në mënyrë dramatike dinamikën e konfliktit dhe do t’i japë fund ngërçit”, ka përfunduar ai.

Terreni i kërkimit të madh për “përgjigjet” dhe “formulën e zgjidhjes” pritet të vazhdojë ditët në vijim, derisa çështja e “autonomisë” për serbët është vendosur lart në listën e prioriteteve të jashtme të kancelarit gjerman Olaf Scholz, presidentit francez Emmanuel Macron dhe kryeministres italiane Giorgia Meloni, në këmbim të njohjes de facto të Kosovës nga Serbia.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.