Ahmeti për Rizvanollin: Ndalimi i prodhimit të kriptovalutave për të kursyer rrymë tregon mosnjohuri bazike
“Ndalimi i prodhimit të kriptovalutave për të kursyer rrymë tregon mosnjohuri bazike të procesit të Mining dhe blockchainit në përgjithësi”.
Kështu ka shkruar në Facebook, ish-kryetari i Prishtinës, Shpend Ahmeti, pasi Ministrja e Ekonomisë, Artane Rizvanolli, ka marrë vendim për ndalimin e prodhimit të kriptovalutave në Kosovë.
“Kriptovalutat duhet të rregullohen dhe mbikqyren, por vendimi i tillë veçse shkakton kosto të cilën qeveria nuk po e kupton”, ka shkruar Ahmeti.
Më katër janar, Ministrja e Ekonomisë, Artane Rizvanolli, përmes një statusi në Facebook ka bërë të ditur se “javën e kaluar kam marrë vendimin për Masa të Emergjencës përmes të cilit ndalohet prodhimi i kriptovalutave në të gjithë territorin e Kosovës.
“Institucionet e rendit do të ndalojnë prodhimin e aktivitetit në fjalë me mbështetje të të gjitha institucioneve relevante të cilat do të identifikojnë lokacionet e prodhimit të kriptovalutave”, ka shkruar Rizvanolli.
Sipas saj, “këto obligime kanë për qëllim trajtimin e çfarëdo mungese të papritur ose afatgjatë të kapacitetit prodhues energjetik, kapacitetit të transmetimit apo të shpërndarjes së energjisë në mënyrë që të tejkalojmë krizën e energjisë pa rënduar më tej qytetarët e Kosovës”.
“Në fund të vitit të kaluar me vendim të Qeverisë së Republikës së Kosovës kemi themeluar Komitetin Teknik për “Masat e emergjencës në furnizimin e energjisë”, ka shkruar Rizvanolli.
Ajo ka theksuar se ky Komitet teknik ka mbajtur dy takime për të identifikuar dhe rekomanduar zbatimin e masave për t’i trajtuar efektet negative të rrethanave të krijuara nga kriza energjetike botërore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com