A nuk janë shitës influencuesit në mediat sociale apo?

Nuk është pak të ndikosh.

Por me sa duket orientimi dhe përcaktimi i zgjedhjeve ditore të përdoruesve të mediave sociale është normalizuar.

Ndikuesit, ose siç njihen rëndom influencuesit, po ndërhyjnë në përzgjedhjen e mallrave dhe shërbimeve të ndjekësve të tyre.

Dhe pastaj vjen shpeshtësia. Këto ndërhyrje ‘të vockla’ s’dinë të ndalen. Përherë e më shumë të tregojnë çfarë të hash për drekë, çfarë të veshësh në takimin e parë, me çfarë buzëkuqi të lyhesh…

Aq sa është kthyer në sforcim.

Bizneset nuk po arrijnë të gjejnë një mënyrë më fitimprurëse se partneriteti me një ndikues të mediave sociale. Dhe si çdo punë tjetër, ka vështirësitë e veta të jesh i tillë.

Specialistja e marketingut Flavia Daja kujton se kjo formë e marketingut nuk është krejt e re. Ka ekzistuar që në kohën e gazetave dhe revistave.

Ka vijuar me personazhet e famshme të televizionit dhe tani në mediat sociale.

“Influencuesit kanë ekzistuar thuajse për aq kohë sa ka pasur të famshëm, por zhvillimi i mediave sociale u dha atyre mundësi të reja përfitimi duke e përdorur imazhin, tashmë në mënyrë të  vetëdijshme”, dallon Daja.

Marketerja tregon për “Albanian Post” se një kategori e re e influencuesve të famshëm nisi nga ata vetë dhe nevoja për ndryshim në mënyrën se si marketohej.

Vetë aktorët ishin edhe iniciatorë sepse ndryshuan mënyrën strikte dhe standarde të marketingut, “duke e bëre atë më njerëzor dhe të prekshëm për publikun”.

E gjitha kjo pasi audienca influencohet më shpejt nëse ndjen që mund të kenë një lidhje me atë personazh, që është i ngjashëm me të.

“Personazhet publike, influencuesit, janë më afër audiencës dhe tregojnë që janë njësoj si ata, prandaj dhe audienca priret t’i ndjekë e me pas të influencohet, herë pas here në mënyrë të pavetëdijshme”, veçon ajo.

Sot, influencuesit janë personalitete të mediave sociale me audiencë besnike të krijuar përmes një komunikimi të rregullt, të drejtpërdrejtë me ndjekësit e tyre.

Sipas saj, nëse dikush nuk e mendon se ky është një profesion, gabohet.

Kërkon prova dhe praktika të ndryshme për të studiuar audiencën, për të mësuar vizionin e kompanisë, nëse përputhet ose jo me vizionin e faqes së vetë influencuesit.

“Ky profesion kërkon kohë dhe investim për të mësuar metodat e reja të komunikimit, gjuhën e re që po krijohet në mediat sociale dhe simbolet. Nuk është e thjeshtë, por nuk është as e pamundur”, thotë specialistja.

Është më tepër sesa postimi i një fotoje të bukur. Pa kreativitet nuk mund të realizohet një përmbajtje e pëlqyer nga audienca.

Daja thekson nevojën për strategji. Nevojën e njohjes së produktit apo shërbimit që influencuesi i mediave sociale kërkon të reklamojë.

Për të, bota e influencuesve dhe marketingu digjital nuk janë bëre ende trend në Shqipëri, por kompanitë serioze e kanë kuptuar fuqinë e reklamimit dhe e planifikojnë në planin e tyre të buxhetit.

“Kam konstatuar që gjithnjë e më shumë audienca pëlqen përmbajtjen me vlerë dhe shpjegime në krahasim me pamjen e jashtme. Personazhet e bukur ‘pa përmbajtje’ nuk do të jenë edhe shumë gjatë trend”, parashikon ajo.

Kjo pasi po prevalon përmbajtja mbi imazhin, besueshmëria e personazhit dhe njohja që ai ka rreth fushës apo produktit që reklamon.

Njerëzit, shton Daja, janë të prirur të blejnë një produkt nga një personazh që e fakton që atë produkt e përdor apo e konsumon edhe vetë.

Në Shqipëri, kompanitë e reja duke parë suksesin e konkurrentëve të tyre të bashkëpunimit me influencues, e planifikojnë që në fillim këtë hap.

Të jesh influencues

“Është e vështirë. Kërkon impenjim në kohë, s’ka orare të përcaktuara, s’ka ditë pushimi, s’ka justifikime shëndeti”.

Daja ravijëzon se nuk bëhet fjalë vetëm për një postim, por duhet ndjekur i gjithë procesi ku ndjekësit pyesin, ndajnë eksperiencat. Duhet të krijosh një komunitet dhe të komunikosh vazhdimisht me të.

“Kompanitë në Shqipëri gjithnjë e më tepër e kanë kuptuar këtë ndryshim dhe rëndësinë që ka bashkëpunimi me një influencues. Por, janë të paqartë në detyrat e një influencuesi dhe mund të ndodhë që të zhgënjehen sepse kanë ngritur pritshmëri të gabuara”, tregon ajo.

Dhe problemi qëndron te perceptimi i gabuar. Një influencues nuk është shitës.

“Një influencues ka zë të shpërndajë markën apo biznesin tënd. Nëse ti bashkëpunon me Angelina Jolie, ajo nuk është shitëse. Mjafton që ajo të citoj që veshjen e saj ia ka besuar biznesit tuaj. Ky është dallimi”.

Zgjidhja më e mirë për të shmangur këto keqkuptime është krijimi i një “skuadre marketingu shumë më të zhvilluar se ajo që mund të kenë, për më shumë kërkime, më shumë ide dhe dëshirë për të ngritur kompaninë”.

Përpos të gjithave, bizneset nuk duhet të mbështeten vetëm te kjo formë marketingu.

Fundja, po ndiqet gjerësisht. Kush do ta bëjë dallimin?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.