Zemërim pas refuzimit të debatit të OKB-së mbi abuzimet e supozuara të Kinës në Xinjiang

Këshilli i OKB-së për të Drejtat e Njeriut ka votuar për të mos debatuar trajtimin e ujgurëve dhe pakicave të tjera kryesisht myslimane në rajonin veriperëndimor të Kinës, Xinjiang.

Lëvizja vjen edhe pasi zyra e OKB-së për të drejtat e njeriut arriti në përfundimin se shkalla e abuzimeve të supozuara atje mund të përbëjë “krime kundër njerëzimit”.

Mocioni për një debat mbi këtë çështje u rrëzua me 19 vota kundër kundrejt 17 pro dhe me 11 vende që abstenuan.

Ky vendim u mirëprit nga Kina, por të tjerët e kanë dënuar si “të turpshëm”.

Shumë nga ata që votuan kundër ishin vende me shumicë myslimane si Indonezia, Somalia, Pakistani, Emiratet e Bashkuara Arabe dhe Katari.

Kurse ndër 11 vendet që abstenuan ishin India, Malajzia dhe Ukraina.

“Kjo është një fitore për vendet në zhvillim dhe një e vërtetë dhe drejtësi e fitores”, ka thënë Hua Chunying, zëdhënësja e punëve të jashtme të Kinës.

“Të drejtat e njeriut nuk duhet të përdoren si pretekst për të krijuar gënjeshtra dhe për të ndërhyrë në punët e brendshme të vendeve të tjera, ose për të frenuar, shtrënguar dhe poshtëruar të tjerët”, ka shtuar ajo.

OKB-ja zbuloi për herë të parë ekzistencën e një rrjeti qendrash paraburgimi në Xinjiang në vitin 2018, duke thënë se të paktën një milion ujgurë dhe pakica të tjera etnike po mbaheshin atje.

Më vonë, Kina pranoi se kishte kampe në rajon, por se ato ishin qendra trajnimi të aftësive profesionale të nevojshme për të trajtuar “ekstremizmin”.

Por mes rrjedhjeve të dokumenteve zyrtare të qeverisë, hetimeve nga grupet e të drejtave të njeriut dhe dëshmitë nga vetë ujgurët, Kina ka lobuar fort për të parandaluar çdo hetim të mëtejshëm për situatën në Xinjiang.

Ish-komisionerja Michelle Bachelet, e cila bëri thirrje për herë të parë për akses “të papenguar” në rajon në vitin 2018, u lejua të kryejë një vizitë në maj.

Megjithatë, raporti i saj mbi situatën u shty dhe u publikua vetëm më 31 gusht, minuta para përfundimit të mandatit të saj.

Paçka se nuk e përmendi fjalën “gjenocid”, raporti zbuloi se ishin kryer “shkelje të rënda të të drejtave të njeriut” dhe se “shkalla e ndalimit arbitrar dhe diskriminues të anëtarëve të ujgurëve dhe grupeve të tjera kryesisht myslimane mund të përbëjë krime kundër njerëzimit”.

Ujgurët janë një popull turk kryesisht mysliman që ndryshojnë në fe, gjuhë dhe kulturë nga grupi etnik Han i Kinës.

Marrë nga “Aljazeera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.