Vuçiç pas takimit me Mitsotakis: Më siguroi se nuk e ndryshon qëndrimin për mosnjohjen e Kosovës
Pas një darke joformale të hënën në mbrëmje në Athinë në mes të liderëve të Ballkanit Perëndimor në prani të përfaqësuesve të Bashkimit Evropian dhe presidentit të Ukrainës e Moldavisë për nder të 20-vjetorit të Samitit të Selanikut, presidenti i Serbisë, Aleksandër Vuçiç, këtë të martë ka takuar edhe nikoqirin e kësaj darke kryeministrin e Greqisë, Kyriakos Mitsotakis.
Takimin në fjalë e ka njoftuar vetë Vuçiç nëpërmjet një postimi në rrjetin e tij social në Instagram, ndërsa ka bërë të ditur se në takim me kryeministrin helen është diskutuar edhe çështja e Kosovës.
Vuçiç ndër të tjera ka theksuar se Mitsotakis i ka garantuar atij se Greqia nuk do të ndryshojë pozicion në raport me pavarësinë e Kosovës.
“Një bisedë e mirë dhe miqësore me kryeministrin grek me të cilin shkëmbyem mendime për bashkëpunimin e përgjithshëm rajonal, çështjet globale dhe qëndrimin e Greqisë ndaj situatës në Kosovë. Miqtë tanë grekë kanë konfirmuar edhe një herë se nuk do të ndryshojnë qëndrimin e tyre zyrtar për mosnjohjen e pavarësisë së Kosovës. Ne do të vazhdojmë të punojmë për forcimin e bashkëpunimit tonë në të gjitha fushat me interes të përbashkët”, ka shkruar Vuçiç në Instagram.
Vuçiç i bindur se Ukraina s’do ta ndryshojë qëndrimin në raport me pavarësinë e Kosovës
Të martën në mëngjese, Vuçiç e takoi edhe presidentin e Ukrainës, Volodymyr Zelesnky, bisedën me të cilin e cilësoi si të drejtë, të hapur, miqësore, konstruktive dhe të sinqertë.
Në një konferencë për media Vuçiç tha se përshtypja e tij pas bisedës me Zelenskyn është se Ukraina nuk do të ketë ndonjë ndryshim pozicioni në raport me pavarësinë e Kosovës.
“Ia shpjegova situatën në lidhje me Kosovën. Nuk mendoj se do të ketë ndonjë ndryshim në qëndrimin e Ukrainës në lidhje me integritetin tonë territorial. Ne e mbështetëm Ukrainën në rrugën e saj evropiane”, tha Vuçiç duke shtuar se “ajo që unë mendoj është më shumë se të menduarit, jam pothuajse i bindur se nuk do të ketë asnjë ndryshim”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com