Vuçiç e quan “truk” hapin e Qeverisë së Kosovës për ta dërguar draft-statutin e Asociacionit për vlerësim në Kushtetuese

Presidenti i Serbisë, Aleksandër Vuçiç, e ka quajtur vetëm “një truk” dërgimin e draft-statutit të Asociacionit të Komunave me Shumicë Serbe me 10 maj në Gjykatën Kushtetuese nga Qeveria e Kosovës si hap ky që i dëshmon komunitetit ndërkombëtar përkushtimin e Kosovës për ta themeluar Asociacionin për serbët e Kosovës.

Ai, duke folur për Radiotelevizionin e Serbisë, tha se qeveritë në Kosovë nuk e kanë formuar Asociacionin tash e një dekadë dhe prapë nuk do ta bëjnë.

Ai, përkundër lobimit të Serbisë, deklaroi se Asambleja e Përgjithshme e Këshillit të Evropës me siguri se do ta çojë tutje procesin e anëtarësimit të Kosovës, por beteja e vërtetë është me 16 maj kur votojnë ministrat e shteteve anëtare që është hapi përfundimtar i anëtarësimit.

“Tani kanë bërë një truk të ri dhe unë dua t’ua prezantoj qytetarëve – pra më 10 maj do të thonë se aktin që evropianët e kanë miratuar do ta referojnë në Gjykatën Kushtetuese për vlerësimin e kushtetutshmërisë. A nuk do t’u mjaftonte disave kjo që që të thonë se ka filluar një proces për Asociacionin, por në fakt asgjë nuk është iniciuar, dhe thonë se kjo është arsyeja që ne të votojmë Kosovën në Këshillin e Evropë. Pra, kjo është diçka që do të ndodhë”, ka deklaruar Vuçiç.

Përndryshe, në letrën e përbashkët që Kryeministri Albin Kurti, Presidentja Vjosa Osmani dhe kryeparlamentari Glauk Konjufca i kanë dërguar raportueses Dora Bakoyanis, janë zotuar se në mirëbesim do ta thamelojnë “sa më shpejt që është e mundur” Asociacionin e Komunave me Shumicë Serbe.

Bakoyanis kishte vendosur si kushte në raportimin e saj për vlerësimin rreth anëtarësimit të Kosovës në KiE që Kosova para mbledhjes së Komitetit të ministrave në KiE të bëjë “hapa substancialë dhe të prekshëm” drejt themelimit të Asociacionit.

Asociacioni deri me 10 maj në Gjykatën Kushtetuese?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.