Ukraina ka nisur një kundërsulm në Kharkiv

Ukraina ka nisur një kundërsulm në rajonin e Kharkiv-it në verilindje të vendit, me disa raportime për luftime në qytetin Balakliia, i cili shtrihet midis qyteteve Kharkiv dhe Izyum.

Gjatë natës dhe herët këtë mëngjes, kreu i administratës shtetërore rajonale të Kharkiv-it, Oleg Synegubov, postoi në Telegram se forcat ruse po bombardonin pjesë të ndryshme të Kharkiv-it, qyteti i dytë më i madh në Ukrainë, dhe luftimet po zhvilloheshin në provincë.

“Lufta aktive vazhdon në vijën e kontaktit. Armiku vazhdon të qëllojë intensivisht në pozicionet e ushtrisë sonë, Forcat e Armatosura të Ukrainës po kundërpërgjigjen. Si rezultat i veprimeve të suksesshme të mbrojtësve tanë, pushtuesit nga kompanitë private ushtarake pësuan humbje të mëdha në Oleksandrivkën e pushtuar përkohësisht”, tha ai në Telegram.

Në përditësimin e fundit ushtarak, forcat e armatosura të Ukrainës thanë se Rusia kishte nisur sulme me raketa tokësore dhe ajrore në infrastrukturën civile “në zonat e Kharkiv-it” dhe gjetkë në Ukrainën lindore dhe jugore, ku luftimet mbeten më intensive midis forcave.

Analistët në Institutin për Studimin e Luftës thanë në një përditësim brenda natës se “forcat ukrainase kanë nisur kundërsulme të mundshme oportuniste në rajonin jugor të Kharkiv [provincës] dhe kanë rimarrë disa vendbanime”.

Mbrëmë, Serhiy Leshchenko, një këshilltar i presidentit ukrainas Volodymyr Zelensky, postoi në Twitter se do të kishte “lajme të mira” nga kreu i shtetit në lidhje me “operacionin kundërsulmues në rajonin e Kharkiv-it”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.