Udhëheqësit e G7-ës dënojnë lëvizjen e fundit të Rusisë

Ministrat e jashtëm të grupit G7-ës të ekonomive më të mëdha në botë kanë rënë dakord të dënojnë njohjen nga Rusia të dy rajoneve të shkëputura në Ukrainë, Donetsk-u dhe Luhansk-u. Lajmin e ka bërë të ditur ministri i Jashtëm i Japonisë, Yoshimasa Hayashi.

Ky i fundit u tha gazetarëve se ministrat vendosën se njohja e dy rajoneve nga Rusia si të pavarura ishte në kundërshtim me sovranitetin dhe integritetin territorial të Ukrainës, si dhe të drejtën ndërkombëtare.

Çfarë ka ndodhur deri më tani?

Pasi Rusia vendosi që të njohë pavarësinë e dy rajoneve separatiste në Ukrainë ka ardhur edhe reagimi i shteteve të ndryshme.

Kancelari gjerman, Olaf Scholz, pezulloi projektin e gazsjellësit “Nord Stream 2”.

Gazsjellësi, i cili do të rriste varësinë evropiane të energjisë nga Rusia, ka qenë një burim i madh “grindjesh” në Evropë dhe Shtetet e Bashkuara të Amerikës për vite me radhë.

Pa iu nënshtruar procesit të certifikimit ose miratimit, tubacioni nuk mund të fillojë të funksionojë.

Mbretëria e Bashkuar

Kryeministri britanik, Boris Johnson, ka zbuluar “këstin e parë” të sanksioneve britanike ndaj Rusisë, duke dënuar agresionin e Vladimir Putin në Ukrainë.

Mbretëria e Bashkuar do të sanksionojë pesë banka ruse dhe tre individë me “vlerë neto shumë të lartë”.

“Ajo që Putin-i po bën do të jetë një fatkeqësi për Rusinë”, tha ai, duke parashikuar “statusin e parisë” për kombin nëse vazhdon të pushtojë më tej Ukrainën.

Bashkimi Evropian

Komisioni Evropian propozoi sanksione për shtetet anëtare të BE-së dhe do të pasqyrojë sanksionet e marra në Krime pas aneksimit të vitit 2014 nga Moska.

Burimet thonë se zyrtarët amerikanë dhe evropianë kanë qenë në diskutime intensive gjatë orëve të fundit mbi mënyrën e procedimit me sanksione shtesë kundër Rusisë.

Shtetet e Bashkuara të Amerikës

Pas grupit të parë të sanksioneve të shpallura të hënën, Shtëpia e Bardhë ka thënë se do të vendosë sanksione shtesë “të rëndësishme”.

Sanksionet e së hënës ishin të kujdesshme në natyrë dhe sanksionet e së martës pritet të shkojnë më tej, por nuk do të jetë goditja e plotë që SHBA-të kanë parashikuar.

Turqi

Presidenti, Recep Tayyip Erdogan, denoncoi vendimin e presidentit rus, Vladimir Putin, duke e quajtur atë “të papranueshme” dhe duke thënë se është në kundërshtim me Marrëveshjet e Minsk-ut.

Kinë

Ministria e Jashtme e Kinës shmangu më shumë se një duzinë pyetjesh për Ukrainën në konferencën e saj ditore të martën.

Në përgjigjet e tij, zëdhënësi i Ministrisë së Jashtme, Wang Wenbin përsëriti se “shqetësimet legjitime të sigurisë duhet të respektohen” dhe u bëri thirrje të gjitha palëve “të ushtrojnë përmbajtje”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.