Tadiç: Kosovën e humbëm në vitin 1999

Ish-presidenti i Serbisë, Boris Tadiç, thotë se shteti i tij i udhëhequr nga Aleksandër Vuçiç, nuk bëri asgjë për të parandaluar situatën aktuale dhe presionet që po vuan Serbia për çështjen e Kosovës, por vetëm pranoi gjithçka – “duke e humbur Kosovën”.

Ndërkaq akuzave të Vuçiç-it se qeveria e kaluar e humbi Kosovën, duke iu referuar administratës së Tadiç-it, ky i fundit thotë se edhe me nënshkrimin e Marrëveshjes së Kumanovës në vitin 1999, kompetencat e shtetit në Kosovë humbën, por edhe me Marrëveshjen e Brukselit Daçiç dhe Vuçiç “thyen pikën e fundit të rezistencës sonë kur është fjala për veriun dhe procesin e negociatave”.

“Nëse do ta kisha lënë veriun e Kosovës të shkojë, siç e kanë lejuar Daçiç dhe Vuçiç në marrëveshjen e Brukselit, do ta dobësoja pozicionin negociator. Filozofia ime politike është – ta zgjidhim problemin, të bëjmë një kompromis, të gjejmë një zgjidhje të qëndrueshme për brezat që do të vijnë, jo vetëm për qeverinë ekzistuese”, theksoi Tadiç gjatë një interviste në N1.

Ndërkaq kur pyetet për propozimin evropian për dialogun e ku thuhet se Serbia nuk do ta njohë pavarësinë e Kosovës dhe nuk do ta pengoj hyrjen e saj në OKB, Tadiç thekson se “ne jemi sjellë në një situatë që është e papranueshme dhe kjo është përgjegjësi e madhe e Vuçiç-it dhe kësaj qeverie”.

“Duhet të kemi diplomaci jashtëzakonisht të fortë dhe të aktivizojmë të gjitha burimet dhe të nisim një ofensivë diplomatike”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.