SHBA-të do të ndihmojnë Australinë të zhvillojë raketa të drejtuara deri në vitin 2025

Shtetet e Bashkuara do të ndihmojnë Australinë të prodhojë sisteme raketash të drejtuara deri në vitin 2025, tha të shtunën në Brisbane Sekretari Amerikan i Mbrojtjes, Lloyd Austin.

Austin dhe kryediplomati Antony Blinken ndodhen në shtetin australian të Queensland-it me rastin e dialogut vjetor ministror (AUSMIN) me homologët e tyre australianë, transmeton Reuters.

“Ne po synojmë disa iniciativa të dobishme reciproke me industrinë australiane të mbrojtjes, dhe këto përfshijnë një angazhim për të ndihmuar Australinë të prodhojë sisteme raketash të drejtuara të lëshimit të shumëfishtë deri në vitin 2025”, tha Austin në një konferencë shtypi.

Shtetet e Bashkuara po përshpejtojnë gjithashtu qasjen e Australisë në municionet prioritare përmes një procesi prokurimi të thjeshtë, tha ai.

Kjo është hera e parë që Australia organizon një takim të nivelit të lartë që nga viti 2019 për shkak të pandemisë COVD 19.

“Ne jemi vërtet të kënaqur me hapat që po ndërmarrim për të krijuar një ndërmarrje të drejtuar armësh dhe eksplozivësh në këtë vend”, tha ministri australian i mbrojtjes Richard Marles.

Ai shprehu shpresën se prodhimi i përbashkët i raketave australiano-amerikane mund të fillojë në Australi pas dy vjetësh.

Marles tha se do të ketë një “ritëm të rritur të vizitave nga nëndetëset amerikane me energji bërthamore në ujërat tona” si pjesë e bashkëpunimit dypalësh.

Pas dy ditë bisedimesh që përfunduan të shtunën, Marles dhe Austin udhëtojnë në Queenslandin verior, ku ushtritë australiane dhe amerikane po marrin pjesë në stërvitjet e luftës Talisman Sabre së bashku me 11 vende të tjera.

Stërvitjet u ndërprenë përkohësisht pasi një helikopter ushtarak australian që merrte pjesë në stërvitje u rrëzua në oqean, duke vrarë të paktën katër persona.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.