Nëse Google-i nuk arrin të fshijë “përmbajtjen e paligjshme”, mbikëqyrësi rus i mediave ka kërcënuar me ngadalësim të shpejtësisë.
Agjencia e lajmeve, BBC, shkruan se Roskomnadzor i ka dhënë Google-it 24 orë afat për të hequr videot, të cilat ai thotë se kanë lidhje me drogën, dhunën dhe ekstremizmin.
Kompania teknologjike, e cila zotëron edhe YouTube-in, pritet të gjobitet midis 800 mijë dhe katër milionë rubla nga shërbimi.
Në një deklaratë të raportuar nga agjencia shtetërore e lajmeve, TASS, Roskomnadzor-i i ka dërguar Google-it më shumë se 26 mijë njoftime për të fshirë atë që ai e ka quajtur “informacion i paligjshëm”.
Gjithashtu deklarata akuzon Google-in për kufizimin e hyrjes së YouTube-it në mediat ruse, përfshirë RT dhe Sputnik, si dhe për mbështetjen e “veprimtarisë së paligjshme të protestës”.
Trafiku në internet
Vëzhguesi ka thënë se nëse Google-i nuk vepron, ai mund të zvogëlojë shpejtësinë e internetit për përdoruesit në Rusi, të cilët përpiqen të hyjnë në Google.
Kompetenca të ngjashme, shteti i ka përdorur edhe gjatë muajit mars me platformën Twitter duke kufizuar hyrjen në të pasi Roskomnadzor-i kishte thënë se platforma nuk kishte arritur të hiqte afro tre mijë postime.
BBC tregon se ofruesit e shërbimeve të internetit në Rusi mund të kufizojnë ose të bllokojnë rrjedhën e të dhënave në faqet e internetit duke i kthyer lidhjet në më të ngadalta gjatë hyrjes në faqe të caktuara.
YouTube-i
Aktualisht, Google-i po e padit mbikëqyrësin rus mbi kërkesat për heqjen e përmbajtjes.
Kjo çështje përfshin dymbëdhjetë video në platformën YouTube, të cilat inkurajojnë të rriturit të bashkohen me protestat e sanksionuara të muajit janar. Këto në mbështetje të kritikut të Kremlin-it, Alexei Navalny.
Lidhur me Navalny-n, ai posedon më shumë se 6.5 milionë abonentë në YouTube dhe poston rregullisht video në platformë duke shprehur kundërshtimin e tij ndaj presidentit rus, Vladimir Putin dhe qeverisë ruse.
Një nga seancat dëgjimore është caktuar më datë 14 të muajit korrik.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
