Rritja ekonomike në Kosovë – Kërkohet që në fokus të jenë investimet kapitale

Kryetari i Odës Ekonomike të Kosovës, Berat Rukiqi, ka thënë se deri në fund të vitit parashikohet që vendit të ketë rritje ekonomike jo më e vogël se 7%.

“Në fund do ta kemi një shifër të rritjes ekonomike që do të jetë një shkallë e rritjes ekonomike e reflekton rikthimin pa pandemisë dhe poashtu një ndryshim të dukshëm sa i përket rritjes së eksportit. Projeksionet janë për një rritje ekonomike jo më e vogël se 7%. Ne nuk mund të presim të kemi të njëjtën shkallë të vizitave të diasporës dhe nuk mund të presim të kemi të njëjtin raport me shtimin e konsumit. Ky vit mund të shënohet i suksesshëm sa i përket rritjes ekonomike”, tha Rukiqi.

Ndërsa, kryetari i Aleancës Kosovare të Bizneseve, Agim Shahin, këtë vit ka një rritje ekonomike që konsiderohet të jetë mbi 8% .

“Rritja ekonomike në Kosovë nuk mund të jetë reale për shkak se kemi pasur rritjes minus vitin e kaluar. Këtë vit kemi një rritje plus e cila konsiderohet që do të jetë mbi 8% dhe do të jetë pozitive për vendin”, theksoi Shahini.

Sipas tij, Qeveria duhet të ketë një strategji për ta luftuar varfërinë e që të ketë investime të reja.

“Në këtë rast duhet një strategji për ta luftuar varfërinë e cila po kanoset dhe duhet të bëhet strategjia për thithjen e investimeve kurse për ulje të çmimeve janë të pafuqishëm qoftë Qeveria apo bizneset e Kosovës. Tash kur jemi në sezonin e dimrit kur edhe rritet niveli i konsumit të energjisë elektrike mund të kemi probleme”.

Shahini ka potencuar se janë duke monitoruar rritjen e çmimeve duke shtuar se kjo po ndodh në gjithë botën dhe se Kosova është e pafuqishme ta ndal këtë trend, raporton EO.

“Aleanca Kosovare e Bizneseve është duke ndjekur për së afërmi trendin e rritjes së çmimeve në tregun e Kosovës. Kemi ardhur në përfundim se çmimet nuk janë rezultat i rritjes së çmimeve nga tregtarët e vendit dhe biznesit por rezultat i rritjes së çmimeve në tregjet globale e që ne 90% jemi importues që varemi nga tregjet e huaja dhe bashkë me rritjen e çmimeve këto produkte që jemi duke i importuar importojmë edhe inflacion”, shtoi ai për EO.

Kurti: Rritja ekonomike e Kosovës frikëson armiqtë e saj

Pas miratimit të projektbuxhetit për vitin 2022 në Qeveri, Kryeministri i Kosovës, Albin Kurti, ka thënë se vendi ka shënuar rritjen më të lartë ekonomike gjatë qeverisjes së tij, duke e krahasuar Kosovën me shtetin kroat.

“Sot lajmi kryesor që i frikësohen të gjithë armiqtë e Kosovës është rritja ekonomike”, pati thënë Kurti më 29 tetor.

“A e dini çka do të thotë që nëse përgjatë viteve të kësaj dekade ne vazhdojmë me rritje nga 10 përqind, ne do t’i afrohemi Kroacisë”, ka thënë ai.

Tutje Kurti tha se rritja ekonomike është e pashembullt në Ballkan.

Sipas tij “ne i afrohemi vendit që së fundmi iu bashkua BE-së. Prandaj, është tejet e rëndësishme dhe asnjëherë mjaftueshëm e theksuar rritja ekonomike e Kosovës tani”.

Rritja ekonomike në vend ka ndodhur për shkak se qytetarët kanë shpresë ka thënë Kurti, duke mos dhënë ndonjë “formulë” se si shpresa rritë ekonominë e vendit.

“Rritja ekonomike ka ndodhur tek ne, se qytetarët mendojnë të ardhmen, dhe më shumë mendojnë të kursejnë sesa të shpenzojnë. Kundërshtarët e Kosovës kanë interes që qytetarët të mos shpenzojnë por kursejnë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.