Roma përgatit kontratë të re për Dybala-n

Paolo Dybala është duke kaluar në formë shumë të mirë me Romën, derisa drejtuesit e klubit thuhet se janë duke e përgatitur një kontratë të re për yllin argjentinas.

Siç raportohet nga “Calciomercato”, drejtuesit e Romës po kërkojnë të aktivizojnë një klauzolë të re në kontratën e Dybala-s, e cila do të rriste pagën e tij dhe do t’i hiqte klauzolën e tanishme të lirimit të kontratës.

Sulmuesi argjentinas aktualisht fiton 4.2 milionë euro neto në sezon dhe kjo do të rritet në 6 milionë euro, e mjaftueshme për të hequr automatikisht klauzolën momentale.

Kontrata aktuale e Dybala-s i lejon atij të largohet nga Roma për vetëm 12 milionë euro për një klub të huaj ose 20 milionë euro për një skuadër italiane.

#Roma, primi approcci per il rinnovo di #Dybala: stipendio, clausola, fattore #Mourinho, cosa c'è da sapere https://t.co/RUvPf4VkSJ

— calciomercato.com (@cmdotcom) January 16, 2023

Të gjitha palët duhet të bien dakord për marrëveshjen e re dhe kjo do të marrë pak kohë, thekson raporti nga media e lartcekur.

Dybala është i lumtur me Romën, por dëshiron të kuptojë planet e ardhshme për klubin, ashtu si edhe trajneri Jose Mourinho.

Palët pritet të takohen gjatë muajit mars dhe për të diskutuar të ardhmen e mesfushorit 29-vjeçar.

Argjentinasi i dha fund lidhjes shtatë-vjeçare me Juventus-in në verë dhe u bashkua me kryeqytetasit në një transferim të lirë, duke nënshkruar një marrëveshje trevjeçare.

Pavarësisht një problemi të shkurtër që e pati me dëmtim, fillimi i Dybala në Romë ka shkuar mirë dhe ai ka kontribuar në 13 gola në 16 ndeshje këtë sezon.

Në ndeshjen e fundit, Dybala shkëlqeu duke shënuar dy gola në fitoren e Romës ndaj Fiorentina-s me rezultat 2:0.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.