Përkrahja e Kurtit s’i ndihmoi VLEN-it t’i fitojë zgjedhjet, Kasami për AP: Bashkëpunimi do të vazhdojë

Përkrahja e kryeministrit të Kosovës, Albin Kurt, nuk e ndihmoi koalicionin “VLEN” që t’i fitojë zgjedhjet presidenciale në Maqedoni të Veriut, meqë “Fronti Evropian” mori mbi 40 mijë vota më shumë.

Megjithatë, njëri nga liderët e koalicionit “VLEN”, Bilall Kasami, ka thënë për Albanain Post se bashkëpunimi me Lëvizjen Vetëvendosje do të vazhdojë.

“Ne vlerësojmë lartë mbështetjen e zotit Kurti dhe Vetëvendosjes dhe ne vlerësojmë që ky bashkëpunim do të vazhdojë edhe në të ardhmen në interes të shqiptarëve dhe integrim të rajonit në Bashkimin Evropian”, tha Kasami.

Po ashtu, ai është pyetur nëse “VLEN” do të bëjë koalicion me VMRO-në pa u bërë ndryshimet kushtetuese, meqë ky ishte kusht i “VLEN” para zgjedhjeve.

“Ne kemi thënë që do të bëjmë koalicion me gjithë ata që do dalin fitues në palën tjetër dhe të cilët bashkë me ne do të punojnë për integrimin e vendit në Bashkimin Evropian”, shtoi.

Ndryshe, kandidati i “Frontit Evropian”, për President të Maqedonisë së Veriut, Bujar Osmani, është fitues absolut me një diferencë prej rreth 35 mijë votave në raport me kundërkandidatin tjetër shqiptar nga radhët e koalicionit “VLEN”, Arben Taravari.

Sipas rezultateve të Komisionit Shtetëror Zgjedhor, Osmani është renditur i treti nga shtatë kandidatë gjithsejtë sa kanë qenë, duke fituar pothuajse në çdo vendbanim me shumicë shqiptare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.