Rikthehet Fjolla Morina – “Mexicana” projekti që pritet të publikohet për festën e Vitit të Ri

Pas një viti voluminoz duke pushtuar titujt e mediave rozë me histori nga jeta e saj personale, këngëtarja, Fjolla Morina duket se ka përgatitur një dhuratë për festat e fund vitit kushtuar fansave të vet.

Fjolla do të publikojë video projektin e parë dhe të fundit për këtë vit, i cili do të vijë në bashkëpunim me artistin, Blasta e që do të titullohet – “Mexicana”.

Burime të Albanian Post kanë kuptuar se “Mexicana” do t’i paraprijë festës së vitit të ri, ndërsa do ta ri sjellë Fjollën në një formë të veçantë duke i qëndruar besnike stilit të saj unik në industrinë e muzikës.

Madje, realizimin e këtij dueti, e kanë konfirmuar edhe publikisht të dy artistët, duke shpërndarë imazhe nga shesh xhirimet e video klipit, i cili pritet të shënojë sukses, marrë parasysh edhe pauzën e gjatë të yllit të hitit “Trileqe”.

Por, gjithsesi, ky nuk është bashkëpunimi i parë në mes të Fjollës dhe Blastas, pasi që dyshja ishin paraqitur me një duet tjetër në edicionin e vitit 2017 të Festivalit të “Këngës Magjike”.

“Shake” ishte kënga konkurruese e atij viti e që po ashtu u mirëprit nga fansat e të dy artistëve – e njëjta numëron afro 1 milion klikime në YouTube.

Deri në publikimin e “Mexicanas”, neve na mbetet të presim dhe të shohim se si kanë vendosur, Fjolla Morina dhe Blasta, të na befasojnë kësaj radhe!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.