Priti Patel në presion pas zbulimit mbi agjencitë e saj të spiunazhit

Politikania britanike që ka shërbyer si Sekretare e Brendshme që nga viti 2019, Priti Patel, pas zbulimit se agjencitë e saj të spiunazhit kanë nënshkruar një kontratë cloud me Shërbimet Ueb Amazon (AWS) është nën presion.

Laburistët e Mbretërisë së Bashkuar kërkojnë që sekretarja e brendshme të shpjegojë pse GCHQ, MI5 dhe MI6 do të përdorin një sistem të sigurisë së lartë të ofruar nga firma me bazë në Shtetet e Bashkuara.

Po ashtu, a është ndërmarrë ndonjë vlerësim i rrezikut përpara nënshkrimit të marrëveshjes.

Marrëveshja, e cila u vlerësua nga ekspertët e industrisë në vlerë prej 500 milionë deri në 1 miliard paund gjatë dekadës së ardhshme, u nënshkrua këtë vit.

Sipas Financial Times, Departamentet e tjera qeveritare, si Ministria e Mbrojtjes, do të përdorin gjithashtu sistemin gjatë operacioneve të përbashkëta.

Conor McGinn, ministri i Sigurisë, të martën e 26 tetorit i shkroi homologut të tij në qeveri, Damian Hinds, për të kërkuar një deklaratë në Parlament.

Aty Patel, duhet të shpjegojë implikimet e mundshme të sigurisë dhe kontigjencat nëse sistemet e Amazon dështojnë.

“Këto raporte janë thellësisht shqetësuese. Ato ngrenë pyetje serioze në lidhje me masat më të gjera të sigurisë në fuqi, kur bëhet fjalë për rreziqet e mundshme të kontraktimit të elementëve kritikë të infrastrukturës së sigurisë kombëtare të Mbretërisë së Bashkuar te kompanitë jo me bazë në Mbretërinë e Bashkuar”, tha ai në letër.

Po ashtu, ai shtron një sërë pyetjesh për qeverinë, si: pse Amazon-it iu dha kontrata, nëse vendimi është diskutuar nga këshilli i sigurisë kombëtare, cilat janë implikimet e kontraktimit të të dhënave te një kompani “jo britanike”?

Pyetje tjetër ishte edhe: nëse është bërë ndonjë vlerësim për ndikimin në qëndrueshmërinë kibernetike të MB, çfarë rreziqesh sjell kjo dhe çfarë kontigjencash janë në vend nëse sistemet e Amazon-it dështojnë?

Zyrtarët qeveritarë thonë se marrëveshja do t’i lejojë spiunët të ndajnë më lehtë të dhënat dhe do të lejojë përdorimin e aplikacioneve të specializuara si njohja e të folurit për të dalluar dhe përkthyer zërat nga orë të tëra komunikimesh të përgjuara.

Downing Street nuk konfirmoi marrëveshjen e raportuar, por mbrojti përdorimin e teknologjisë private nga shërbimet e sigurisë.

Zëdhënësi zyrtar i kryeministrit tha: “unë nuk do të komentoj mbi teknologjinë e përdorur nga shërbimet e inteligjencës për arsye sigurie dhe ndjeshmëri tregtare”.

Kontrata ka ndezur shqetësimet mbi sovranitetin, sepse të dhënat më sekrete të Mbretërisë së Bashkuar do të mbahen nga një kompani e vetme amerikane. GCHQ u tha agjencive të lajmeve se nuk do të komentonte mbi raportet në lidhje me marrëdhëniet e saj me furnizuesit e teknologjisë. AWS nuk pranoi të komentojë mbi raportin.

Në shkurt, spiunët britanikë në GCHQ thanë se kishin përqafuar plotësisht inteligjencën artificiale (AI) për të zbuluar modele në të dhënat globale për të luftuar dezinformimin armiqësor dhe për të kapur abuzuesit e fëmijëve.

Prej vitesh, GCHQ ka përdorur forma bazë të AI, si teknologjia e përkthimit, por po e rrit përdorimin e saj, pjesërisht në përgjigje të përdorimit të AI nga shtetet armike dhe pjesërisht për shkak të shpërthimit të të dhënave që e bën atë efektive.

Gus Hosein, drejtori ekzekutiv i Privacy International, tha se kishte shumë gjëra që parlamenti, rregullatorët dhe publiku duhej të dinin rreth marrëveshjes.

“Ky është një tjetër partneritet shqetësues publiko-privat, i rënë dakord në fshehtësi”, tha ai.

“Nëse kjo kontratë realizohet, Amazon do të pozicionohet si ofruesi kryesor i cloud për agjencitë e inteligjencës botërore. Amazon duhet të përgjigjet vetë për të cilat shërbime sigurie të vendeve do të ishte e gatshme të punonte”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.