Princi i Kurorës Saudite mbërrin në Jordani për një vizitë rajonale

Princi i Kurorës Saudite, Mohammed bin Salman (MBS) ka mbërritur në Jordani mes një rregullimi të marrëdhënieve pas viteve tensione me Amman-in.

Ardhja e MBS të martën shënon vizitën e parë të tillë në më shumë se pesë vjet nga sundimtari de fakto i Arabisë Saudite dhe vjen në një kohë kur ekonomia e Jordanisë po lufton me efektet ekonomike të luftës në Ukrainë dhe COVID-19.

“Kjo është një mundësi për një fazë të re në lidhjet jordaneze-saudite dhe për të vazhduar një program projektesh ekonomike dhe investimesh të reja”, tha një zyrtar i lartë jordanez për agjencinë e lajmeve “Reuters”.

Drejtuesit e biznesit dhe zyrtarët shpresojnë se vizita do të zhbllokojë të paktën 3 miliardë dollarë projekte investimi, për të cilat Arabia Saudite u angazhua në vitet e fundit, por që nuk u realizuan kurrë.

MBS mbërriti në Kajro në pjesën e parë të turneut të tij rajonal të hënën, një vizitë që vjen përpara udhëtimit të Presidentit të Shteteve të Bashkuara, Joe Biden në rajon muajin e ardhshëm.

Presidenti egjiptian, Abdel Fattah el-Sisi, priti MBS në aeroport, një mirësjellje për liderin de fakto saudit, i cili është mbështetës i qëndrueshëm financiar i qeverisë egjiptiane.

Vizita në Jordani është ndalesa e dytë e turneut rajonal të MBS. Pjesë e turneut të tij është edhe Turqia.

Gjatë dekadave të fundit, Jordania dhe Arabia Saudite kishin lidhje të ngushta me dy monarkitë që bashkëpunonin për çështjet e sigurisë dhe pushtimin izraelit të territorit palestinez. Megjithatë, marrëdhënia e tyre është acaruar.

Për Arabinë Saudite, Jordania kurrë nuk ishte plotësisht e përkushtuar ndaj kauzave të saj politike, përkatësisht luftës kundër Jemenit.

Marrëdhëniet saudio-jordaneze më pas arritën në një nivel të ulët gjatë mandatit të ish-presidentit të SHBA-ve, Donald Trump, kur Amman, aleat i vendosur i SHBA-ve, ndjeu se marrëdhëniet e ngushta të Riadit me administratën e Trump-it minuan rolin kryesor të Jordanisë në paqebërjen arabo-izraelite.

Mbështetja e MBS për “Marrëveshjen e Shekullit” të Trump-it gjithashtu anashkaloi Aman-in, i cili tradicionalisht kishte luajtur një rol ndërmjetësues midis Izraelit, palestinezëve dhe pjesës tjetër të botës arabe.

Tensionet janë ndezur gjithashtu midis dy palëve lidhur me kujdestarinë hashemite të vendeve të shenjta në Jerusalem.

Jordanezët shpresojnë se vizita e MBS do t’u japë fund marrëdhënieve të tensionuara dhe do të ndihmojë në përmirësimin e situatës së vështirë ekonomike në vendin e varur nga ndihma.

Marrë nga Al Jazeera, përshtatur për Albanian Post!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.