Këshilli i Sigurimit i OKB-së caktoi një takim të premten me kërkesë të Rusisë.
Kjo, për të diskutuar ato që Moska pretendon se janë “aktivitetet biologjike ushtarake të SHBA-ve në territorin e Ukrainës”.
“Ky është pikërisht lloji i përpjekjes së flamurit të rremë që kemi paralajmëruar se Rusia mund të nisë për të justifikuar një sulm me armë biologjike ose kimike”, deklaroi Olivia Dalton, zëdhënëse e Misionit të SHBA-ve në Kombet e Bashkuara.
Ajo shtoi se nuk do e lënë Rusinë që të ndezë botën ose të përdorë Këshillin e Sigurimit të OKB-së si një vend për të promovuar dezinformimin e tyre.
Kërkesa ruse, e shpallur në një postim në Twitter të enjten pasdite nga zëvendësambasadori i saj i parë në OKB, Dmitry Polyansky, pason refuzimin e SHBA-ve ndaj akuzave ruse.
Në përgjigje të akuzave të kësaj jave nga zëdhënësja e Ministrisë së Jashtme ruse Maria Zakharova, sekretarja e shtypit e Shtëpisë së Bardhë Jen Psaki paralajmëroi se Rusia mund të përdorë armë kimike ose biologjike kundër Ukrainës.
Psaki e quajti pretendimin e Rusisë “të pahijshme”.
“Kjo është e gjitha një dredhi e dukshme nga Rusia në përpjekje për të justifikuar sulmin e saj të mëtejshëm të paramenduar, të paprovokuar dhe të pajustifikuar ndaj Ukrainës”, tha zyrtarja amerikane.
Presidenti ukrainas Volodymyr Zelenskyy mohoi akuzat e Rusisë se Ukraina po përgatitet të sulmojë me armë kimike ose biologjike.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
