Pekini vendos një objektiv ambicioz rritjeje prej 5%, por “nuk do të jetë e lehtë”

Nuk ka qiell të qetë blu. Sikur të ishte një shenjë e kohëve të vështira që po kalon Kina.

Në një shesh të blinduar që nga agimi, gati tre mijë delegatët e Asamblesë Kombëtare hyjnë në Sallën e Madhe të Popullit me buzëqeshje të mëdha në çdo rast.

Nga gjeneralët me uniformë me yje të ekspozuar deri te përfaqësuesit e pakicave etnike me veshjet e tyre tradicionale.

Në skenën e kuqe, i ulur në qendër, me dy filxhanët e çajit të vendosur tashmë para tij, presidenti kinez Xi Jinping është gati të dëgjojë “raportin e punës së qeverisë” të kryeministrit Li Qiang.

Në orën 9:02 të gjithë u ngritën në këmbë për himnin kombëtar. Më pas nis hapja zyrtare e punës së këtij “parlamenti me karakteristika kineze”.

“Sukseset tona në vitin 2023 ia detyrojmë Sekretarit të Përgjithshëm Xi Jinping, i cili është në krye për të përcaktuar kursin”, nis fjalën e tij kryeministri.

Emri i Xi është përmendur 16 herë këtë vit, 14 vitin e kaluar.

Gjithçka mbaron në vetëm një orë e pesëmbëdhjetë minuta: kjo është e mjaftueshme që Li të njoftojë – siç pritej – se objektivi i rritjes së PBB-së për vitin 2024 do të jetë rreth 5 për qind.

Një objektiv ky, i njëjtë me atë të vitit të kaluar, por ambicioz duke pasur parasysh vështirësitë që po kalon ekonomia e dytë më e madhe në botë.

“Arritja e qëllimit nuk do të jetë e lehtë, prandaj duhet të punojmë shumë dhe të kërkojmë përpjekjen e të gjithëve”, pranon kryeministri.

“Bazat e rimëkëmbjes dhe rritjes ekonomike nuk janë mjaftueshëm të forta, siç dëshmohet nga mungesa e kërkesës efektive, mbikapaciteti në disa sektorë, pritshmëritë e ulëta të publikut dhe shumë rreziqe të vazhdueshme dhe rreziqe të fshehura. Disa biznese të vogla dhe të mesme hasin vështirësi në funksionimin e tyre. Ne përballemi me presione për krijimin e përgjithshëm të vendeve të punës dhe problemet strukturore të punësimit”.

Po ashtu ai vijon duke u shprehur se “duhet të ndjekim progresin duke garantuar stabilitet”.

Xi Jinping pritet t’i rezistojë presionit të tregut për të rritur përpjekjet stimuluese të Kinës

Premton të transformojë modelin e rritjes, “të bëjë rregullime strukturore”.

Ai flet për 12 milionë vende të reja pune. Një zhvillim të “cilësisë të lartë”. Për të zbutur rreziqet e sektorit të pasurive të paluajtshme dhe për të reduktuar mbetjet në administratat vendore.

Sakaq, pret një deficit buxhetor të barabartë me 3% të prodhimit ekonomik, nga 3.8% vitin e kaluar, por më e rëndësishmja, planifikon të emetojë një trilion juanë në obligacione speciale shumë afatgjata të thesarit.

Duket se qeveria po fokusohet shumë në zbutjen e rreziqeve, në vend të nxitjeve të mbështetjes ekonomike në shkallë të gjerë.

Shpenzimet ushtarake do të rriten me 7.2%, në përputhje me vitin e kaluar: 1,665 miliardë juanë. Paçka se buxheti i mbrojtjes mbetet më shumë se tre herë më i ulët se ai i Shteteve të Bashkuara të Amerikës.

Prioritetet absolute për Pekinin mbeten inovacioni dhe forcimi i industrisë, për të ndjekur vetë-mjaftueshmërinë teknologjike – në përgjigje të kufizimeve perëndimore – duke intensifikuar përpjekjet në të dhënat e mëdha dhe inteligjencën artificiale, në përputhje me dëshirën e Presidentit Xi për të krijuar “forca të reja prodhuese”.

Raporti i kryeministrit citon sektorë të veçantë si makinat elektrike, energjia e hidrogjenit, materialet e reja, ilaçet inovative dhe aviacioni tregtar.

Politikat për të mbështetur shkallën e lindjeve, një shqetësim i madh i udhëheqjes komuniste: Popullsia e Kinës ra për të dytin vit radhazi në vitin 2023, me lindjet e reja që bien në rreth gjysmën e atyre të vitit 2016.

Ka vend edhe për një pasazh të shkurtër përfundimtar mbi Tajvanin, i cili nuk ndryshon shumë nga qëndrimi i zakonshëm kinez, edhe nëse në raportin e këtij viti, ndryshe nga i kaluari, shprehja “ribashkim paqësor”, e formuluar tani, zhduket ndryshe: “Ne do të promovojmë zhvillimin paqësor të marrëdhënieve brenda ngushticës, duke qëndruar të palëkundur në kauzën e ribashkimit”.

“Ne do të zbatojmë politikën e Partisë për të zgjidhur çështjen e Tajvanit, duke qëndruar të ankoruar në parimin e Kinës së vetme, duke kundërshtuar aktivitetet separatiste që synojnë pavarësinë e Tajvanit dhe ndërhyrjen e jashtme”.

​Një gjuhë mesatarisht më e ashpër që duhet të balancojë vendosmërinë e Pekinit ndaj ishullit, por në të njëjtën kohë të stabilizojë marrëdhëniet me miqtë e Taipeit, SHBA-ve në radhë të parë.

Në fund të fjalimit të Li ka vend edhe për një aluzion të një politike të jashtme që është “e paqes dhe zhvillimit paqësor”.

“Për një botë multipolare, një globalizim gjithëpërfshirës që sjell përfitime për të gjithë. Ne jemi të përkushtuar për të promovuar një lloj të ri të marrëdhënieve ndërkombëtare. Dhe ne do të kundërshtojmë të gjitha veprimet hegjemoniste dhe të dorës së lartë për të mbështetur barazinë dhe drejtësinë ndërkombëtarisht”.

Pas një ore e një çerek e gjitha kjo mbaroi.

Do të jetë hera e fundit që shtypi do të ketë mundësinë të dëgjojë Li live.

Nga ky vit nuk ka më konferencë përfundimtare për shtyp në fund të punimeve.

Shenja e një Kine më të errët. Dhe të liderit Xi, i cili vazhdon të forcojë pushtetin e tij duke ulur të gjithë zyrtarët e tjerë, përfshirë kryeministrin, në role dytësore.

Marrë nga “La Repubblica”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.