Parlamenti Evropian zgjedh si presidente konservatoren, Roberta Metsola

Parlamenti Evropian ka zgjedhur avokaten konservatore malteze Roberta Metsola si presidente, në vend të David Sassoli-t – disa ditë pas vdekjes së tij. Ajo është gruaja e parë në 20 vjet që mban këtë post.

Metsola u zgjodh me një shumicë të qartë prej 458 vota pro nga 616 të hedhura.

Koha e të zgjedhurit nuk kishte asnjë lidhje me vdekjen e Sassoli-t, pasi ai do të largohej në fund të janarit – pas dy vitesh e gjysmë në post – sipas një marrëveshjeje për ndarjen e pushtetit.

Kush është presidentja e re?

Në moshën 43-vjeçare, Metsola është personi më i ri në historinë e legjislativit që mban këtë post dhe gruaja e parë në 20 vjet.

Ajo vjen nga fraksioni i Partisë Popullore Evropiane (EPP), ndërsa Sassoli ishte anëtar i grupimit politik italian të qendrës së majtë Socialistët dhe Demokratët (S&D).

Si një nënë e katër fëmijëve, kundërshtimi i saj i fortë ndaj abortit ka tërhequr kritika nga kundërshtarët.

Ajo është deputete e Parlamentit Evropian që nga viti 2013. Si deputete e Partisë Nacionaliste, ajo ka qenë aktive që në rininë e saj duke bërë fushatë si studente që Malta të bëhet anëtare e BE-së.

Si Presidente e Parlamentit Evropian, ajo do të drejtojë aktivitetet e seancave plenare të legjislaturës dhe do të ruajë rendin gjatë seancave. Roli i Presidentit ka të bëjë me dhënien e së drejtës së fjalës folësve, nënshkrimit të ligjeve dhe zakonisht flet në hapjen e samiteve të BE-së.

Të Gjelbrit, të Majtët dhe fraksionet nacional-konservatore dhe reformiste Evropiane gjithashtu paraqitën kandidatët e tyre. Megjithatë, si zgjedhja e EPP-së, Metsola ishte konsideruar si kryesuesja.

Parlamenti ka pasur vetëm dy presidente të mëparshme gra – Simone Veil dhe Nicole Fontaine, të dyja franceze, që kur u bë një asamble e zgjedhur drejtpërdrejt në vitin 1979.

Marrëveshja për dorëzim

Sassoli u nda nga jeta në moshën 65-vjeçare pas disa ndërlikimeve shëndetësore, që kishte pasur muajt e fundit. Ai ka qenë anëtar i asamblesë së BE-së për më shumë se dhjetë vjet, pasi kishte kaluar nga gazetaria në politikë me Partinë Demokratike të qendrës së majtë.

Në vitin 2019 ai u zgjodh papritur me mbështetjen e dy grupimeve kryesore politike – S&D dhe EPP, si dhe anëtarët liberalë.

Sassoli dhe grupet kishin arritur një marrëveshje që ai t’ia dorëzonte postin dikujt nga EPP-ja në gjysmë të mandatit të tij.

Parlamenti të hënën nderoi Sassoli-n në një seancë plenare në qytetin francez Strasburg, ku mbajtën një minutë heshtje.

Italia e nderoi me një funeral shtetëror në Romë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.