Osmani: Blloku politik shqiptar po shpërbëhet, ndarja e disa partive është punë e një qendre hibride

Ministri shqiptar i Punëve të Jashtme në Qeverinë e Maqedonisë së Veriut, Bujar Osmani, është shprehur i shqetësuar me ndarjet e partive politike shqiptare që po ndodhin në Maqedoninë e Veriut, dhe sipas tij kjo është punë e një qendre hibride.

Së fundmi në Maqedoninë e Veriut, Izet Mexhiti, me disa deputetë është larguar nga partia ku ishte nënkryetar, Bashkimi Demokratik për Integrim – i udhëhequr nga Ali Ahmeti – ku ka vendosur që të krijojë një parti të re. Përveç BDI-së – që është partia më e madhe shqiptare në Maqedoninë e Veriut – ndarje kanë ndodhur edhe tek Lëvizja Besa, që udhëhiqet nga kryetari i Komunës së Tetovës, Bilall Kasami, si dhe tek Alternativa e Afrim Gashit.

Duke pasur parasysh lëto çarje tek partitë shqiptare në Maqedoni të Veriut, Osmani ka frikë se po përcahet blloku politik shqiptar.

“Edhe nga BDI u nda një grup deputetësh edhe nga BESA u nda edhe nga Alternativa u nda një grup. Pra kemi një përçarje në bllokun politik shqiptar. Unë e vendosa këtë në kontekst të asaj qendre hibride politiko-ekonomike, e cila, sipas informacioneve tona ka rënë dakord për tre drejtime kryesore, gjegjësisht, përfundime”, tha Osmani, transmeton “AlsatM”.

Osmani vlerëson se, këto tre qëllime të kësaj qendre hibride politiko-ekonomike, që sipas tij janë formuar nga oligarkët dhe politikanët, “janë copëtimi i partive shqiptare, ruajtja e kapitalit nga privatizimi dhe mosndëshkimi i ndërsjellë”.

“Ideja e këtyre oligarkëve dhe politikanëve është që të ruhet monopoli në ekonomi dhe në jetën politike karshi veprimit dhe pushtetit të partive shqiptare në Maqedoni”.

“Jo të shkatërrohet BDI-ja, por për të krijuar parti politike lokale që do të merren me njëra-tjetrën dhe nuk do mund të rrezikojnë interesat e atyre oligarkëve. Mendoj se është e dëmshme për funksionimin normal dhe interesat e shtetit, sepse ato janë politika të ndarjes”, shtoi ai.

Por, përkundër kësaj, Osmani beson se “qëllimi i këtyre personave është i destinuar të dështojë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.