Nxënëset iraniane i bashkohen protestave antiqeveritare

Në Iran, vajzat e shkollave të mesme janë bërë më të fundit  që i janë bashkuar protestave antiqeveritare në numër të madh teksa vendi mbajti zi për një adoleshente të vrarë në ditët e para të protestave.

Nika Shahkarami, e cila jetonte në Teheran dhe do të kishte mbushur 17 vjeçe të dielën, u zhduk në shtator. Familja e gjeti trupin e saj në morgun e një qendre paraburgimi 10 ditë më vonë.

Presidenti Ebrahim Raisi ka bërë thirrje për unitet kundër protestave edhe pse ato vazhduan të rriteshin, duke bashkuar iranianët përtej ndarjeve etnike dhe klasore, pavarësisht nga shtypja e qeverisë.

Ai përsëriti linjën zyrtare të qeverisë se lëvizja drejtohej nga provokatorë të huaj, por pranoi se iranianët ishin të zemëruar për “të metat” e Republikës Islamike.

Zemërimi publik është aq i përhapur saqë edhe një gazetë e përditshme e linjës së ashpër sfidoi hapur autoritetet, duke i akuzuar për mohim të dështimeve dhe jo-popullaritetit.

“As armiqtë e huaj dhe as opozita vendase nuk mund t’i çojnë qytetet në një gjendje trazirash pa një sfond pakënaqësie. Mohimi i këtij fakti nuk do të ndihmojë”.

Demonstratat kanë zgjatur gati dy javë dhe përfaqësojnë sfidën më serioze popullore për udhëheqësit e moshuar teokratikë të Iranit në më shumë se një dekadë.

Ndryshe nga lëvizjet e kaluara, ato janë udhëhequr nga gratë.

Fillimisht u ndezën nga vdekja në paraburgim e një gruaje të re kurde, e cila ishte arrestuar nga policia e moralit dhe emri i Mahsa Amini është bërë një thirrje për përkrahësit.

Por protestat janë zgjeruar në një thirrje më të gjerë për ndryshim, nga një popullsi e frustruar nga kontrollet politike dhe izolimi.

Ndërkaq, forcat e sigurisë janë përgjigjur me municion të vërtetë dhe dhunë brutale, duke vrarë mbi 50 persona dhe duke arrestuar mbi 1 mijë e 500.

Por iranianët kanë vazhduar të dalin në rrugë dhe në shtëpitë, shkollat ​​dhe zyrat e tyre sulmojnë ose heqin fotot e dy liderëve suprem që kanë sunduar që nga revolucioni – Ayatollah Khomeini dhe tani Ayatollah Ali Khamenei.

Në një video nga një klasë, një vajzë zëvendësoi një imazh të çiftit me sloganin e lëvizjes së protestës.

Në një imazh tjetër, një grup adoleshentësh fotografuan veten duke bërë gjeste të turpshme ndaj dy burrave.

Protestuesit kanë miratuar një thirrje tubuese që e ka origjinën nga luftëtaret femra kurde: “Gratë. Jeta. Liria”. Në të gjithë Iranin, gratë ecin dhe kërcejnë në rrugë pa flokët e mbuluar dhe duke djegur shamitë e tyre.

Aty ku njerëzit nuk janë në gjendje të marshojnë, ata kanë organizuar protesta në ambiente të mbyllura dhe kanë shmangur një goditje nga qeveria në internet për të ngarkuar video dhe foto.

Autoritetet iraniane kanë një histori të gjatë të përdorimit të forcës vdekjeprurëse kundër protestuesve, duke përfshirë vitin 2019 dhe 2009.

Teksa lëvizja po rritet dhe sundimtarët në Teheran duken gjithnjë e më të shqetësuar, qeveritë perëndimore e kanë paralajmëruar Khamenein kundër përshkallëzimit.

Qeveria është përpjekur të frikësojë të famshmit dhe reporterët iranianë që të qëndrojnë të heshtur në internet dhe të detyrojë civilët e zakonshëm të kthehen në shtëpitë e tyre.

Të hënën studentët protestuan kundër arrestimeve masive në Teheran, me një demonstratë në qytetin konservator të Mashhad-it, ku ata sugjeruan se aq shumë prej tyre ishin arrestuar sa burgu më famëkeq i vendit dukej më shumë si një kampus.

Nxënëset marshuan në rrugë pa hixhabet e tyre, duke thirrur “Gratë. Jeta. Liria” në qytetin e Karaj, në perëndim të kryeqytetit dhe në qytetin kurd të Sanandajt.

Skenat kishin jehonë të ditëve pas Revolucionit Islamik të vitit 1979 që solli në pushtet qeverinë aktuale.

Asokohe, një numër i madh grash dolën për të protestuar kundër hixhabit të detyrueshëm dhe nxënësit e shkollave të mesme luajtën një rol kyç, megjithëse demonstratat u shtypën.

Këto kohë, dhjetëra gazetarë iranianë janë arrestuar në një përpjekje të dukshme për të shtypur lajmet në lidhje me protestat dhe qeveria është përpjekur të mbyllë internetin dhe të ndalojë aksesin në faqet kryesore të mediave sociale.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.