Nga sot policët bëhen me kamera në trup

Policia e Kosovës ka njoftuar se këtë të premte ka filluar faza e testimit të përdorimit të kamerave të trupit nga njësia për kontroll të autostradave, e cila më pas, do të vazhdojë edhe tek njësitet e tjera të policisë.

Përmes një postimi në rrjetin social “Facebook”, nga policia kanë thënë se “mbështetur në detyrat dhe autorizimet e policisë të parapara me ligj, si dhe me qëllim të rritjes së përgjegjësisë, transparencës dhe llogaridhënies ndaj qytetarëve, e po ashtu rritjes së besimit të qytetarëve ndaj policisë, vite më parë Policia e Kosovës në mbështetje dhe përkrahje nga Shtetet e Bashkuara të Amerikës (ICITAP dhe INL), kishte filluar pilot- projektin për pajisje të zyrtarëve policorë me kamera të trupit”.

“Policia e Kosovës përmes projektit të pajisjes së zyrtarëve policorë me kamera të trupit, përveç tjerash ka për qëllim që të argumentojë aktivitetet policore që kryhen gjatë detyrës zyrtare në terren”, thuhet në njoftimin e tyre.

Ndërkaq, ata kanë potencuar se për tu finalizuar si i tillë projekti, në bashkëpunim dhe koordinim me institucionet kompetente, “fillimisht janë përgatitur dokumentacionet e nevojshme dhe Procedurat Standarde të Operimit, për të arritur tani deri në fazën testuese të përdorimit të kamerave të trupit në terren”.

“Me qëllim të informimit të qytetarëve dhe opinionit, Policia e Kosovës njofton se nga sot ka filluar faza testuese e përdorimit të kamerave të trupit nga Njësia për Kontroll të Autostradave, për të vazhduar më pas edhe me njësitë tjera policore”.

Ndërsa, pas fazës testuese, nga Policia e Kosovës kanë bërë me dije se përmes njoftimit zyrtar, apo konferencës zyrtare “do të njoftojë opinionin dhe qytetarët, për fillimin zyrtar të përdorimit të kamerave të trupit, përfshirë edhe dhënien e informacioneve më të detajuara të këtij projekti”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.