Në fokus të spiunit “Pegasus” ishin më shumë figura të opozitës polake

Përdorimi i “spyware” nga anëtarët e Bashkimit Evropian pritet të përballet me një shqyrtim të ri pas zbulimeve se telefonat celularë të dy shtetasve të tjerë polakë me lidhje të ngushta me një senator të opozitës janë shënjestruar nga një klient i “NSO Group”. Këtë e bënë të ditur disa ekspertë të sigurisë.

Analiza mjeko-ligjore nga “Amnesty International” zbuloi sesi Magdalena Łośko, ish-asistentja e senatorit polak Krzysztof Brejza, ashtu edhe babai i Brejza-s, Ryszard Brejza, morën mesazhe me tekst në vitin 2019 që studiuesit thanë se ishin teknikisht në përputhje me sulmet “spyware” nga klientët e “NSO Group” duke përdorur “Pegasus”.

Në të dyja rastet, koha e shënjestrimit përputhej me paraqitjen e numrave të telefonit celular të Łośko-s dhe Ryszard Brejza në një bazë të dhënash të zbuluar në zemër të Projektit “Pegasus”, hetim ndaj “NSO Group” nga një konsorcium mediatik, duke përfshirë  të përditshmen britanike “The Guardian”, “Wyborcza” dhe “Die Zeit”.

Rrjedhja e të dhënave është një listë me më shumë se 50 mijë numra telefoni që nga viti 2016, që besohet se janë përzgjedhur si persona me interes nga klientët e qeverisë të “NSO Group”.

Konsorciumi beson se të dhënat tregojnë objektivat e mundshëm që klientët e qeverisë së “NSO-së” identifikuan përpara mbikëqyrjes së mundshme.

Prania e numrit të telefonit të një individi në bazën e të dhënave nuk do të thotë se telefoni celular është hakuar.

Nga ana e saj, “NSO” ka mohuar fuqimisht se të dhënat kanë ndonjë lidhje me firmën izraelite dhe tha se numrat e telefonit në listë nuk janë objektiva të klientëve të tyre.

Përdorimi i “Pegasus”-it nga autoritetet polake doli për herë të parë në dritë në dhjetor 2021. Zbulimet e reja nga projekti “Pegasus” tregojnë se një klient i “NSO Group” ka kërkuar gjithashtu të hakojë të paktën dy individë të afërt me Brejza-n.

Laboratori i sigurisë i “Amnesty International” zbuloi se katër mesazhe të dyshimta me tekst i ishin dërguar Łośkos në prill 2019, kur ajo drejtonte fushatën e Brejza-s për Parlamentin Evropian.

“Amnesty” gjeti dhjetë mesazhe të dyshimta me tekst në celularin e Ryszard Brejza-s midis korrikut dhe gushtit 2019.

Në të dyja rastet, mesazhet e drejtonin marrësin në faqet e internetit që ishin krijuar para sulmeve në 2019 dhe nuk janë më aktive.

Provat e disponueshme mjeko-ligjore nuk i lejuan studiuesit e sigurisë të konfirmonin nëse përpjekjet për të hakuar Łośko ose Ryszard Brejza ishin të suksesshme.

Byroja Qendrore Antikorrupsion e Polonisë, CBA, bleu “Pegasus” në vitin 2017 duke përdorur fonde nga Ministria e Drejtësisë, sipas dokumenteve të paraqitura në një seancë dëgjimore të senatit polak nga ish-kreu i Zyrës Kombëtare të Auditimit.

CBA ka refuzuar më parë të konfirmojë nëse ka përdorur “Pegasus” kundër ndonjë individi, por ka thënë se çdo përdorim i mjetit të mbikëqyrjes do të kishte marrë pëlqimet e kërkuara ligjërisht.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.