Myanmar/ 459 të vdekur që prej grushtit të shtetit

459 persona kanë mbetur të vdekur që prej grushtit të shtetit që ndodhi në Myanmar më 1 shkurt.

Sipas një raporti nga Shoqata e Asistencës për të Burgosurit Politikë, ndër viktimat përfshihen fëmijë, të rinj dhe mësues.

Sipas shoqatës, rreth 60 shtëpi u dogjën në qytezën e PyiGyi Dagun nga një zjarr që ra më 27 mars. Rezidentët e vendeve fqinje, nuk u lejuan të shkonin të ndihmonin banorët e bllokuar aty. Kjo, pasi forcat e juntës hapën zjarr ndaj tyre.

Rreth 2 mijë e 600 janë arrestimet që kanë ndodhur deri më 28 mars. 37 prej tyre janë dënuar.

Çdo ditë, në Myanmar raportohen viktima dhe sulme të reja.

Nga ana tjetër, në ushtrinë e Myanmar-it, ka zëra që protestuesit i shohin si kriminelë. Disa prej ushtarëve madje, kanë hequr dorë nga pushkët.

“Duhet të zgjedhim, të jemi me popullin apo me parinë”, thotë njeri prej tyre. “Unë shpresoj shumë që të gjithë në fund të ditës, të zgjedhin shtetin”.

Arrestimi i tashmë ish-kancelares Aung San Suu Kyi, u dënua rëndë nga ndërkombëtarët. Ajo është parë si një simbol i paqes dhe demokracisë në botë. Në vitin 1991, ajo fitoi Nobelin për paqe.

Pas grushtit, kontrollin e shtetit e ka marrë gjenerali Min Aung Hlaing.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.