Musk fitoi një kontratë me forcën hapësinore amerikane

Pronari i SpaceX, Elon Musk, ka fituar kontratën e parë nga Forca Hapësinore e SHBA-ve për të ofruar komunikime satelitore të personalizuara për ushtrinë sipas programit të ri Starshield të kompanisë, duke zgjeruar rolin e miliarderit amerikan në industrinë e mbrojtjes.

SpaceX (Space Exploration Technologies Corp.) ka konkurruar me 15 kompani, duke përfshirë Viasat Inc, për porositë e punës me vlerë 900 milionë dollarë deri në vitin 2028 nën programin e ri të kontratës “Proliferated Low Earth Orbit” të forcës hapësinore.

Ky program përdor shërbimet e komunikimit të satelitëve që orbitojnë nga një distancë prej 160 kilometrash deri në 1600 kilometra mbi Tokë, shkruan Bloomberg.

Shërbimi Starshield do të ofrohet përmes konstelacionit ekzistues të satelitëve të komunikimit Starlink të SpaceX, duke shtuar punën me Pentagon-in në portofolin në rritje të SpaceX.

Kjo përfshin një kontratë në qershor me Pentagon-in për të ofruar komunikime satelitore Starlink për ushtrinë ukrainase dhe lëshimin e 13 satelitëve këtë muaj për agjencinë e zhvillimit hapësinor të Pentagonit.

Roli i Musk në Ukrainë është kritikuar pasi një biografi e re zbuloi se ai refuzoi kërkesën e qeverisë ukrainase për të zgjeruar mbulimin e Starlink në Krimenë e kontrolluar nga Rusia për të ndihmuar me një sulm me dron detar ndaj objektivave ruse vitin e kaluar.

Kjo ishte përpara se Pentagon-i të kontraktonte SpaceX për të ofruar shërbimin Starlink në Ukrainë.

Megjithatë, vendimi dhe lëvizjet e Musk, duke përfshirë bisedimet e tij me presidentin rus Vladimir Putin, ngritën dyshime midis disa senatorëve për besueshmërinë e tij si furnizues i Pentagon-it, duke përfshirë një hetim nga Komiteti i Shërbimeve të Armatosura të Senatit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.