Ministrja e Malit të Zi: Do ta përkrahim anëtarësimin e Kosovës në KiE

Ministrja për Çështja Evropiane e Malit të Zi, Majda Gorçeviç, ka thënë se shteti që ajo përfaqëson e mbështet anëtarësimin e Kosovës në Këshillin e Evropës, pas miratimit të raportit të raportueses për Kosovën në Këshillin e Evropës, Dora Bakoyannis, për anëtarësimin e Kosovës në këtë organizatë.

Këto komente, Gorçeviç i ka bërë në një konferencë të përbashkët për media me zëvendëskryeministrin e Kosovës, Besnik Bislimi, pas nënshkrimit të Marrëveshjes për Programin e Bashkëpunimit Ndërkufitar IPA III, duke komentuar votën kundër të deputetes malazeze Maja Vukiçeviç, për raportin e Bakoyannis.

“Votimi i disa deputetëve nuk do të thotë domosdoshmërisë qëndrimin e qeverisë. Mali i Zi në maj do ta përkrahë Kosovën për anëtarësim në Këshillin e Evropës”, deklaroi Gorçeviç.

Ndryshe, Kosova, më 27 mars, kaloi edhe një pengesë drejt rrugës së saj për anëtarësim në Këshillin e Evropës, ku aplikoi në maj të vitit 2022.

Të mërkurën Komiteti për Çështje Politike dhe Demokraci në Asamblenë Parlamentare të KiE-së miratoi opinionin e raportueses për Kosovën, Dora Bakoyannis, ku thuhej që Kosova ka përmbushur kushtet për t’u bërë anëtare e plotë e Këshillit të Evropës.

Nga 36 përfaqësues të shteteve anëtare të Këshillit të Evropës që morën pjesë, 31 votuan për, 4 ishin kundër miratimit të opinionit ndërsa një përfaqësues abstenoi.

Dy përfaqësues të Serbisë votuan kundër Kosovës. Për mos miratimin e opinionit votoi kundër edhe përfaqësuesi i Malit të Zi dhe ai i Bosnje e Hercegovinës.

Abstenues ishte përfaqësuesi i Greqisë në KiE.

Kështu Kosova për të dytën herë me radhë kaloi me sukses testin për anëtarësim në këtë organizatë ndërkombëtare, meqë më 24 prill të vitit të kaluar, Kosova fillimisht kishte akumuluar votat e nevojshme përmes së cilës Komiteti Ministror i KiE-së në një mbledhje të jashtëzakonshme me më shumë se 2/3 e votave kishte proceduar tutje aplikimin e Kosovës në Asamblenë Parlamentare.

Nga gjithsej 46 shtete sa kishin votuar në prill të vitit të kaluar 33 shtete, duke përfshirë edhe shtetet e rajonit si Shqipëria, Mali i Zi, Sllovenia, Maqedonia e Veriut dhe Kroacia kishin votuar pro.

Derisa 12 të tjera kishin votuar kundër apo abstenuar.

Hungaria, Rumania, Qiproja, Spanja, Azerbajxhani, Gjeorgjia dhe Serbia kishin votuar kundër, kurse Bosnja dhe Hercegovina, Greqia, Sllovakia, Moldavia dhe Ukraina kishin abstenuar.

Hapat – në detaje – drejt anëtarësimit të Kosovës në Këshillin e Evropës

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.