Marinsat amerikanë do të krijojnë njësi në Japoni për mbrojtjen e ishujve

Shtetet e Bashkuara do të krijojnë një njësi të reagimit të shpejtë të Trupave Detare në prefekturën Okinawa.

Kjo, për mbrojtjen e ishujve të largët në Japoninë jugperëndimore, kanë thënë burime diplomatike japoneze dhe amerikane.

Lajmi u bë i ditur nga agjencia vendase “Japan Times”.

Një Regjiment Detar Litoral (MLR) do të krijohet brenda pak vitesh si pjesë e një riorganizimi të Trupave Detare në prefekturë, thanë burimet të hënën, mes intensifikimit të aktiviteteve ushtarake kineze në Detin e Kinës Lindore.

Shtetet e Bashkuara duan të kenë gati Okinawa MLR deri në vitin 2026, duke i armatosur me raketa dhe pajisje më të lehta, raportoi gjithashtu “Yomiuri Shimbun”.

Plani pritet të paraqitet në një takim “dy plus dy” të sigurisë që përfshin ministrat e Jashtëm dhe të Mbrojtjes të Japonisë dhe Shteteve të Bashkuara, i cili do të mbahet në Washington të mërkurën, shtuan burimet.

Gjatë këtyre bisedimeve, të dyja palët planifikojnë gjithashtu të bien dakord për përfshirjen e hapësirës së jashtme brenda kompetencës së nenit 5 të marrëveshjes së tyre dypalëshe të sigurisë.

Kjo, pasi Japonia kërkon të parandalojë sulmet ndaj satelitëve të saj mes një nevoje në rritje për t’i përdorur ato për monitorimin dhe mbledhjen e informacionit mbi lëvizjet ushtarake të vendeve të tjera, thanë burimet.

Neni 5 thotë se Washingtoni do të mbrojë territoret nën administrimin e Tokios nga sulmet e armatosura.

Por ngritja e njësisë së re mund të shkaktojë një reagim të ashpër nga vendasit në Okinawa pasi prefektura e ishullit tashmë mban barrën e rëndë të pritjes së rreth 70 për qind të sasisë totale të tokës së përdorur ekskluzivisht për instalimet ushtarake amerikane në Japoni.

Kina ka rritur sigurinë e saj ushtarake në detet e Kinës Jugore dhe Lindore, me anijet e saj të rojes bregdetare që hyjnë vazhdimisht në ujërat territoriale të Japonisë rreth ishujve Senkaku, një grup ishujsh të pabanuar të kontrolluar nga Tokio që pretendohen gjithashtu nga Kina, ku njihen si Diaoyu.

Përveç njësisë Okinawa, administrata e Presidentit të SHBA Joe Biden po shqyrton krijimin e një tjetër MLR-je në Guam duke reformuar dy regjimente ekzistuese, sipas burimeve.

Të përbërë nga rreth 1 mijë e 800 deri në 2 mijë personel për njësi, MLR-të janë në gjendje të vendosin në mënyrë fleksibël grupe të vogla marinsash në ishujt e largët për të siguruar terren kundër armiqve sulmues dhe për të mbështetur anijet luftarake të SHBA-ve ose aleatëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.