Liverpool ka arritur të fitojë me përmbysje, 2-1, përballë Crystal Palace në Premier League këtë të shtunë.
“Selhurst Park” priti takimin mes vendasve të Crystal Palace dhe miqve Liverpool-it. Ndeshja hapi javën e 16 të Premier League.
Pjesa e parë e takimit përfundoi me rrjeta të paprekura, teksa vendasit realizuan një gol i cili u anulua nga VAR.
Në pjesën e dytë, Crystal Palace do të ishte sërish i pafat teksa VAR-i do i anulonte një tjetër gol. Megjithatë, Jean-Philippe Mateta realizoi me 11 metërsh në minutën e 57.
Por, pavaresisht realizimit të vendasve, miqtë do të arrinin të përmbysnin takimin në minutat e mbetura, të ndihmuar edhe nga kartoni i dytë i verdhë i Jordan Ayew që i la ata me 10 lojtarë në fushë.
Mohamed Salah realizoi në minutën e 76 për të vendosur barazpeshën.
Goli i egjiptianit solli dhe një rekord për lojtarin, duke çimentuar statusin e tij si një legjend për klubin e “Anfield”. Ai bëhet lojtari i pestë në historinë e klubit që shënon 200 gola në të gjitha garat me fanellën e Liverpool-it.
Ndërsa goli i dytë për të besuarit e Jurgen Klopp-it u realizua në minutën e parë shtesë nga talenti anglez, Harvey Elliott.
Me rezultatin e arritur, Liverpool ngjitet përkohësisht në krye të renditjes së Premier League me 37 pikë. Një pikë më shumë se Arsenal-i i vendit të dytë, me “Topçinjtë” që kanë një ndeshje më pak. Crystal Palace qëndron në vendin e 14 me 16 pikë.
Premier League do të vijojë këtë të shtunë me katër takime të orës 16:00:
Brighton – Burnley
Manchester United – Bournemouth
Sheffield United – Brentford
Wolves – Nottingham Forest
Takimi i fundit i ditës në Premier League do të luhet duke filluar nga ora 18:30 mes Aston Villa-s dhe Arsenal-it.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com