Lituania vendos gardhin kufitar me Bjellorusinë

Parlamenti i Lituanisë ka vendosur të ndërtojnë një gardh të lartë metalik me tela gjembi, në kufi me Bjellorusinë, për të ndaluar emigrantët.

Kjo masë vjen pas fluksit të lartë të migrantëve që kanë kaluar në Lituani përmes Bjellorusisë, duke shënuar shifra rekord.

Autoritetet në Lituani, Letoni dhe Poloni kanë akuzuar presidentin bjellorus, Aleksandër Lukashenko, se i ka përdorur emigrantët për t’i bërë presion BE -së, që të anulojë sanksionet kundër vendit të tij.

Lituania ka deklaruar se, gardhi, i cili do të jetë 508 km përgjatë kufirit me Bjellorusinë, do të përfundojë në shtator të vitit të ardhshëm.

Ndërtimi i kësaj barriere do të kushtojë 152 milionë euro.

Në Parlament, gjithashtu do të diskutohet nëse do të lejohet ushtria lituaneze që të patrullojë kufirin dhe të kufizojë përkohësisht azilkërkuesit. Aktualisht vetëm rojet kufitare lejohen të patrullojnë kufirin.

Këtë vit, rreth 4 mijë e 26 individë nga Bjellorusia kanë kaluar ilegalisht në Lituani, një vend me 2.8 milionë banorë.

Shumica vijnë nga Iraku, e ndjekur nga Republika e Kongos dhe Kameruni, sipas Shërbimit të Rojës Kufitare të Lituanisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.