Dega e Lidhjes Demokratike të Kosovës në Gjilan, përkatësisht kryetari i kësaj dege, Lutfi Haziri, ka akuzuar partinë që udhëheqë me këtë komunë, Lëvizjen Vetëvendosje dhe kryetarin Alban Hyseni, për keqqeverisje.
Nga kjo parti kanë thënë se “avaritë dhe shkeljet në institucionet e Komunës së Gjilanit s’kanë të ndalur, fatkeqësisht po administrojnë pa asnjë procedurë ligjore”.
“Shkeljet në institucionet tona komunale duket se nuk kanë të ndalur. Avaritë në këto institucione kanë shkuar deri në atë pikë sa që pa asnjë procedurë të prokurimit e procedurë ligjore, të blihen mjete të vjetra në vlerë prej 200 mijë euro”, ka thënë Haziri në një konferencë për media.
Me këtë rast, pohoi ai, “Komuna e Gjilanit ndërhyn në punët e ndërmarrjes publike ‘Ecohigjiena’, duke bartur kështu përgjegjësi shtesë në ndërmarrjen ‘Tregu’, e cila është mbingarkuar me punë”.
“Anashkalimi i ndërmarrjeve, në të ardhmen do të tregojë qartë se humbës në këtë mes janë vetëm Komuna e Gjilanit dhe qytetarët e saj, ngaqë 49% të aseteve janë publike”.
Sipas tij, si rezultat i “keqmenaxhimit, sot kemi rrugë në gjendje të tmerrshme e varreza në gjendje të mjerueshme, të cilat nuk po mirëmbahen as minimalisht siç do të duhej të mirëmbaheshin”.
Ndërsa, ai shtoi se shkalla e papunësisë po “zbutet’ edhe më tej me kontrata në vepër, “ku sot janë mbi 49 zyrtarë me kontrata të tilla, e shumica prej tyre me shkollim të mesëm”.
“Nuk po flasim për projekte të mëdha që këta duhet t’i sjellin. Po flasim për vazhdim të projekteve të cilat janë nisur nga qeveritë e kaluara, e presim të vazhdohen e të përfundohen nga qeveritë e tanishme qendrore dhe lokale”.
Tutje, nënkryetari i LDK-së potencoi se e vetmja risi që kanë kuptuar për autostradën e Gjilanit është se shtyllat e ndriçimit “kanë blerë nga Serbia”, për të cilën Ministri i Infrastrukturës dhe Planifikimit Hapsinor, Liburn Aliu, e barti përgjegjësinë tek kompanitë të cilat kanë punuar.
“Puna në shumë lote ka stagnuar, e datat e përfolura për përfundimin e saj vetëm po afrohen, kurse në teren nuk po shihet dritë e bardhë në fund të tunelit. Kosto e përgjithshme e autostradës pritet të rritet për 7% , e arsye për këtë rritje nuk ka dhënë askush”.
Përveç kësaj, Haziri pohoi se “në gjendje hiç më të mirë qëndrojnë edhe rrugët regjionale, të cilat për shkak të mospagesës, kanë mbetur pa u punuar e pa u përfunduar”.
“Në kohën kur bashkatdhetarët tanë i kemi këtu, kaosi që po krijohet në këto rrugë, po shkakton tollovi të cilat kanë mundur të tejkalohen, nëse me kohë këto projekte kishin pasur vëmendjen e nevojshme nga Qeveria dhe presionin e duhur nga Komuna”.
Ai shton se zbatimi i projekteve në 6 mujorin e parë, sipas tij, “është më i ulëti në 23 vjetët e fundit, duke bërë që drejtoritë komunale të dështojnë në zbatimin e projekteve të cilat janë miratuar në Kuvendin Komunal dhe në Kuvendin e Republikës së Kosovës”.
“Kemi bërë të qartë në fillim dhe po e ripërsërisim prapë që Lidhja Demokratike e Kosovës është e gatshme të jep kontributin e saj për të krijuar stabilitet, ashtu siç e krijoi në Kuvendin Komunal. Jemi konstruktivë, dhe do vazhdojmë të mbesim të tillë deri në fund të këtij mandati”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
