Kush nuk sprapset për bashkim nuk ka interes PD-në në pushtet, por veten në krye të PD-së, thotë Agalliu për Albanian Post

25 marsi ishte ditë e gjatë për Partinë Demokratike pas njohjes së ndryshimeve statutore të Kuvendit të Berishës të 11 dhjetorit nga Gjykata e Tiranës.

Pas këtij zhvillimi, nisën zyrtarisht negociatat për ribashkimin e strukturave të forcës politike.

PD-ja e njohur publikisht si zyrtare, u përfaqësua në bisedime nga Enkelejd Alibeaj, Gazment Bardhi si edhe Arbi Agalliu ndërsa nga kahu tjetër ishin anëtarët e Komisionit të Rithemelimit, Flamur Noka, Edmond Spaho, Ivi Kaso, Albana Vokshit dhe vetë ish-kryeministri Sali Berisha.

Pak u bë publike realisht nga ajo çfarë u diskutua, por rruga për bashkim mbeti themel i diskursit të dy palëve pas takimit.

Mbi detaje se çfarë u diskutua në tryezën mes palëve, ka folur për Albanian Post, deputeti i PD-së, Arbi Agalliu.

“Ato persona që nuk bëjnë hapa pas për të bërë të mundur bashkimin e demokratëve, nuk kanë interes të vijë PD-ja në pushtet, por thjesht duan të jenë në krye të drejtimit të saj”.

Kështu, Agalliu ka zbuluar se në takimin e zhvilluar mes kampeve të një kahu, u vu re edhe njëherë se ka një ngërç.

“Nga pjesa dërrmuese e deputetëve të Partisë Demokratike, po kështu edhe nga kryetar i Grupit Parlamentar, është kërkuar ajo që është bërë publike: Tërheqja e Berishës”, shtoi ai.

Sipas deputetit demokrat, nuk mund të ketë bashkim nëse nuk ka një tërheqje të ish-liderit të djathtë.

“PD-ja nuk mund të vijë kurrë në pushtet, së paku duke mos qenë bashkë të gjithë demokratët. Por përveç kësaj duhet që dhe elektorati gri t’i bashkohet PD-së, për ta sjellë në pushtet, në qeveri, sepse besojmë fort që kjo nuk mund të arrihet me një politikan apo drejtues partie, i cili nuk është i dëshiruar nga SHBA-të”.

Prandaj, bën me dije Agalliu, i kanë kërkuar Berishës të tërhiqet duke i dhënë mundësinë që ai që njihet “si Komisioni i Rithemelimit, së bashku me përfaqësinë apo të gjithë deputetët e PD-së, të ndërtojnë një platformë organizimi të përbashkët për të shkuar më pas në zgjedhje, ku çdo anëtar i PD-së, sipas rregullit një anëtar një votë, do të zgjedhë kryetarin e ri”.

“Kjo do të dojë një riorganizim të gjithë strukturave të PD-së nga seksioni, grupseksioni, dega etj.. Kemi diskutuar disa minuta me njëri-tjetrin duke shprehur qëndrimet tona”, vijoi më tej Agalliu.

Deputeti demokrat po ashtu, artikuloi se në thelb, ishte fjala bashkim, por që në konkluzion Berisha “nuk ka ndërmend të tërhiqet nga pozicioni i tij”.

“ Ne nuk kemi ndërmend të pranojmë – me gjithë respektin – një individ i cili në gjykimin tonë, nuk mund të sjellë PD-në në pushtet, jo vetëm për shkak të ciklit politik të tij, por mbi të gjitha për shkak të mbajtjes në shpatulla të termit non-grata. Pritet të vijojnë diskutimet dhe të shikohet si do shkojë”.

Teksa, mbi ardhjen në pushtet, ai ravijëzon se pa fituar në zgjedhjet lokale bashki, nuk mund të realizohet.

Ndaj, është e qartë se formula e vetme e demokratëve, ka të bëjë me bashkimin dhe jo me interesat personale të individëve në parti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.