Në përmbyllje të diskutimeve pas mbledhjes së 23 marsit, Kryesia e Partisë Demokratike ka ftuar “palën tjetër” që të bëhet pjesë e ngritjes së grupit të punës. Kjo, për të bërë gjithçka në funksion të bashkimit.
Deklarata është publikuar në median sociale “Facebook”.
“Kryesia e Partisë shpall vullnetin e saj për të bërë gjithçka në funksion të bashkimit dhe fton zyrtarisht në bisedime kolegët e palës tjetër”, cilësohet në qëndrimin zyrtar të kësaj force politike.
Në vijim të njoftimit bëhet me dije se grupi do të ngrihet me pjesëmarrjen e anëtarëve të Kryesisë, Grupit Parlamentar dhe Kolegjit të Kryetarëve.
Ndër të tjera, Kryesia apeloi edhe për shmangien e gjuhës së urrejtjes, shantazhit, përçarjes, fyerjes dhe arrogancës mes demokratëve.
“Nga përçarja dhe konflikti i brendshëm mes demokratëve dëmtohet Partia Demokratike dhe përfiton vetëm regjimi i Edi Ramës”, shton reagimi i PD-së.
Sakaq, në fund të reagimit bëhet thirrje nga ana e strukturës së PD-së që të ndërpritet çdo iniciativë dhe proces i njëanshëm.
Reagimet
Gjatë mbledhjes së Kryesisë, kanë qenë dy deputetët demokratë Helidon Bushati dhe Ervin Salianji, të cilët kanë kërkuar heqjen e “dyerve të blinduara”.
Bushati është shprehur se heqja e tyre do të jetë hapi i parë “drejt bashkimit të partisë”.
Ndërsa, Salianji e konsideron një veprim simbolik, ku përmes saj tregohet “hapja e partisë”.
Mbledhja e 23 marsit ishte thirrur për të diskutuar pikërisht përplasjet brenda kësaj force politike.
Kujtojmë që dy ditë më parë, Lulzim Basha dha dorëheqjen nga posti i kryetarit të PD-së.
Ky vendim i tij erdhi fill pas mbledhjes së Grupit Parlamentar, Kryesisë dhe Kolegjit të Kryetarëve pasditen e 21 marsit.
“Jemi këtu për të mirën e PD-së. Bashkimi është kryefjala e retorikes dhe e vlerësimit tonë politik”, u shpreh fillimisht Bushati.
Sipas tij, vetëm të bashkuar mund të jenë konkurrues në zgjedhjet e ardhshme, duke cilësuar se “lokalet janë më të afërta”.
Sakaq, Salianji ka deklaruar se dyert e hekurit “ta shpifin” dhe as nuk preken me dorë. Për këtë arsye duhen hequr.
Pas largimit të ish-kryedemokratit, numri dy i PD-së, Gazment Bardhi bëri me dije në një njoftim për mediat, se detyrën e përkohshme për drejtimin e PD-së do ta ketë nënkryetari Enkelejd Alibeaj.
Ky i fundit theksoi se PD-ja ishte gati të bashkëpunonte me anëtarët e tjerë të grupit që janë pezulluar, për t’i dhënë fund përçarjes.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com