Dorëhiqet Lulzim Basha

Pas humbjes në zgjedhjet e 6 marsit, por edhe pas kërkesave të disa prej deputetëve, Lulzim Basha dha sot dorëheqjen nga posti i kryetarit të Partisë Demokratike.

Ky vendim i tij erdhi menjëherë fill pas mbledhjes së Grupit Parlamentar, Kryesisë dhe Kolegjit të Kryetarëve pasditen e 21 marsit.

“Partia Demokratike po përjeton një krizë të thellë. Për këtë arsye dhe për të ndihmuar PD-në dhe demokratët të lënë mënjanë ndasitë joparimore, i vetëdijshëm për peshën që mora mbi vete, për atë që e kam quajtur vendimin tim më të vështirë politik, kam vendosur të hedh një hap pas duke u dorëhequr nga detyra e kryetarit të PD-së”.

Më një fjalim të ndjerë, Basha u shpreh se këtë vendim e ka marrë për të kthyer bashkimin e demokratëve.

“Unë dhe demokratët u përballëm me akuza të shumta. Fatkeqësisht përpjekja për të mbajtur PD të bashkuar, nuk kishte sukses”.

Arsyet e dorëheqjes

Më tej, ai vijoi duke treguar arsyet se pse dha dorëheqjen, duke theksuar se investoi gjithçka për një zgjidhje që do t’i shërbente edhe PD-së, edhe transparencës.

“Sot nuk dua të ndalem në çfarë ka ndodhur e si ka ndodhur, kush kishte të drejtë e kush ishte gabim. Këtë jam i bindur se do ta qartësojë koha”, tha Basha.

Sakaq, ai theksoi se ky vendim “nuk është një tërheqje për rehati personale, por një nxitje më shumë që betejën tonë, për një PD të së ardhmes, ta bëjmë të gjithë bashkë të zhveshur nga çdo shpifje se kjo që ka ndodhur këto gjashtë muaj është bërë për karrigen e kryetarit”.

“Ndaj dua sot t’i them kujtdo që ka besuar dhe beson se PD duhet të shohë drejt të ardhmes, se unë jam dhe do jem tërësisht i angazhuar krah jush, do jem zëri juaj, nuk do ta braktis kurrë sakrificën tuaj, nuk do lodhem kurrë për t’u shprehur mirënjohjen, për sakrificat, mundin dhe kontributin tuaj. Me vendosmëri do të bëj gjithçka, që ato të mos shkojnë dëm, por t’i japin forcë vizionit tonë për një Parti Demokratike që zgjedh të ardhmen dhe i prin rrugës së shqiptarëve drejt saj”, vijoi Basha.

Ndër të tjera, ai e bëri të qartë se kontributi i tij në PD nuk do të ndalet.

“Kjo do të thotë se unë do të vazhdoj pa reshtur e pa u lëkundur të punoj, duke u përkushtuar me mish e me shpirt për këtë ringritje të PD-së rreth vlerave, parimeve dhe standardeve tona si demokratë”.

Për zgjedhjet brenda PD-së

Ndërsa sa u përket zgjedhjeve brenda partisë, Basha shprehu bindjen se “ka nevojë që të nisë sa më parë një proces vetëdijësimi, analize, përbashkimi parimor dhe ripërtëritjeje, e më pas një proces zgjedhor i hapur, transparent, i lirë dhe i drejtë, nga baza në qendër i gjithë lidershipit të PD-së”.

“Demokratët janë të lodhur nga konflikti i brendshëm, nga fushatat dhe gjuha denigruese, nga e cila dëmtohet PD-ja dhe Shqipëria dhe përfiton vetëm Edi Rama dhe klika e tij”.

Basha e përmbylli fjalën e tij me mesazhin se vendi do të ketë një PD më të bashkuar dhe më të fortë.

“Shqipëria meriton dhe do të ketë një Parti Demokratike të fortë, parimore, në krah të njerëzve, në krah të interesit qytetar e kombëtar dhe të aleatëve strategjikë, e gatshme për t’u përballur dhe për të fituar mbi të keqen që i ka zënë frymën vendit, për të ardhmen e Shqipërisë dhe demokracisë”, e përmbylli fjalën ai.

Po çfarë ndodh me drejtimin e PD-së tani?

Pas dorëheqjes së Bashës, pritet që sekretari i Përgjithshëm i PD-së, Gazmend Bardhi, të mbledhë Këshillin Kombëtar dhe të mandatojë një nga nënkryetarët e partisë që të drejtojë PD-në deri në zgjedhjen e kryetarit të ri.

Nënkryetarë të PD-së aktualisht janë Jorida Tabaku dhe Enkelejd Alibeaj, pasi Grida Duma dhe Agron Gjekmarkaj dhanë dorëheqjen nga posti. Kjo përcaktohet në nenin 46, pika 4 e statutit të PD-së.

“Kryetari i Partisë gjatë veprimtarisë së tij të përditshme i cakton detyra dhe fusha të caktuara përgjegjësie Nënkryetarëve të Partisë. Në mungesë të zgjatur të kryetarit dhe me autorizim të tij, njëri prej tyre zëvendëson Kryetarin. Në mungesë të këtij autorizimi, duke përfshirë rastet e dorëheqjes nga detyra të Kryetarit, Sekretari i Përgjithshëm mbledh Këshillin Kombëtar, i cili komandon Nënkryetarin që do të drejtojë Partinë deri në rikthimin e Kryetarit në detyrë apo zgjedhjen e Kryetarit të ri”, shkruhet në statutin e PD-së.

Humbjet e Bashës

Që prej 2013-s, vit kur PS-ja fitoi zgjedhjet parlamentare kundër Sali Berishës, ndërsa Basha u zgjodh si kryetar i PD-së, humbjet për këtë të fundit nuk kanë pasur të ndalur.

Në zgjedhjet vendore të vitit 2015 kampi socialist – me ndarjen e re territoriale që u bë me reformën territoriale asokohe – mori 45 bashki kundrejt 16 që fitoi kampi demokrat.

Po ashtu, edhe në vitin 2017, zgjedhjet parlamentare i fitoi e vetme Partia Socialiste, duke shënuar një mandat të dytë për socialistët.

Ndërsa në zgjedhjet vendore të vitit 2019 do të shihnin një bojkot nga pala demokrate, duke bërë kështu që socialistët të drejtonin edhe 61 bashkitë e vendit.

Ndërkohë viti 2021 pa sërish një humbje të thellë të demokratëve kundrejt socialistëve që garuan të vetëm duke mos krijuar asnjë koalicion.

E fundit ishte humbja e thellë që pati PD-ja në zgjedhjet e pjesshme lokale më 6 mars 2022.

Gjashtë ishin bashkitë në garë, por PD-ja nuk arriti të merrte asnjërën prej tyre.

Pesë bashki u fituan nga Partia Socialiste dhe një nga koalicioni Shtëpi e Lirisë.

Fill pas këtyre zgjedhjeve ish-nënkryetarja e PD-së, Grida Duma dhe Agron Gjekmarkaj, kërkuan dorëheqjen e Bashës.

Jo vetëm, por edhe dy nënkryetarët e tjerë Jorida Tabaku dhe Enkelejd Alibeaj kërkuan që Basha të dorëhiqet.

Pavarësisht këtyre humbjeve, Basha nuk u dorëzua.

Kriza e brendshme në PD

Gjatë lidershipi-t të tij, Lulzim Basha do të përballej dhe me disfatën e krizës së brendshme në PD.

Do të ishte një vendim i Departamentit Amerikan të Shtetit, më 19 maj të vitit 2021, që do të sillte një përçarje “të thellë” të demokratëve.

Ish-lideri i PD-së, Sali Berisha, së bashku me familjen e tij do të shpalleshin persona non grata. Kjo e fundit solli dhe vendimin e Bashës për të larguar nga Grupi Parlamentar Berishën.

Një ditë përpara fillimit të punimeve të Legjislaturës së re, më 9 shtator Basha deklaroi se e largonte Berishën nga Grupi Parlamentar.

Por, si kundërpërgjigje ndaj kësaj, Berisha nisi menjëherë një aksion duke mbajtur një seri foltoresh për të mbledhur firmat për thirrjen e Kuvendit Kombëtar, e cila u mbaj më 11 dhjetor. Nga kjo u krijua një Komision të Përkohshëm Rithemelimi të PD-së.

“Për një PD të së ardhmes”, do e mbyllte Basha fjalën e tij – po cili do të jetë fati i PD-së, ringritje apo bashkim?!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.