Kryebashkiaku francez i dënuar për përdhunim ende drejton qytetin nga qelia

Grupet feministe në Francë kanë shprehur zemëratën e tyre që një kryebashkiak francez i burgosur për përdhunim po lejohet ende të drejtojë qytetin e tij nga qelia e burgut.

Georges Tron, i cili dikur shërbeu si ministër në qeverinë Sarkozy, u burgos në shkurt për përdhunimin dhe sulmin seksual të një pjesëtareje të re të stafit. Ajo punonte në bashkinë e tij të qytetit në Draveil, në jug të Parisit.

Kryebashkiakut 63-vjeçar iu dha një dënim me pesë vite burg, nga të cilat dy vite u pezulluan, me gjykatën që përmendte “kufizimin moral” që ai mbajti mbi punonjësen në një rol vartës. Ai mohoi akuzat dhe e ka apeluar vendimin në gjykatën më të lartë të Francës.

Nga qelia e tij e burgut, Tron ka refuzuar të dorëhiqet nga puna e tij si kryetar bashkie dhe vazhdon të drejtojë qytetin me 30 mijë banorë. Ai komunikon me ekipin e tij me letra dhe duke e përshkruar burgosjen e tij thjesht si një “pengesë”.

Takimi i këshillit bashkiak të kësaj jave u hap me ekipin e Tron-it që lexoi me zë të lartë një letër me udhëzime në lidhje me buxhetin e qytetit. Kjo provokoi zemërim nga politikanët e opozitës.

Gabrielle Boeri-Charles, i grupit opozitar Transition Démocratique, Écologique et Sociale, tha se Tron-i nuk kishte më “autoritetin moral” për të drejtuar qytetin.

Në rrugë, jashtë takimit, grupet feministe protestuan me një tallje të Tron-it pas hekurave. Demonstruesit thanë se refuzimi i tij për të dhënë dorëheqjen ishte “skandaloz” dhe “revoltues”.

Një peticion në internet nga grupet feministe Osez le Féminisme dhe Shoqata Evropiane Kundër Dhunës ndaj Grave në Punë (AVFT) po i bëjnë thirrje qeverisë të nxjerrë një dekret për heqjen e Tron-it nga posti i tij.

Ato thanë se ishte “e pakonceptueshme” që një përdhunues i dënuar dhe i burgosur të mbetet në krye të një qyteti dhe forcës lokale të policisë. Nous Toutes, një kolektiv kundër dhunës ndaj grave, këtë javë i kërkoi kryeministrit, Jean Castex: “Çfarë po pret?”.

Qeveria ka refuzuar të marrë masa. Muajin e kaluar, kishte një shkëmbim në senat kur senatorja socialiste Laurence Rossignol i kërkoi qeverisë të hiqte Tron-in nga pozicioni i tij. Éric Dupond-Moretti, avokati i profilit të lartë i mbrojtjes penale i cili u emërua si ministër i drejtësisë nga Emmanuel Macron vitin e kaluar, tha se qeveria nuk mund të veprojë sepse ishte në proces një apel. Ai tha se ishte “herezi” të sugjeronte ndërhyrjen e qeverisë.

Rossignol vuri në dukje se Dupond-Moretti kishte qenë avokati i Tron-it kur çështja e përdhunimit u gjykua për herë të parë në 2018. Ajo i tha senatit se nuk mund të besonte se qeveria kishte zgjedhur Dupond-Moretti për t’iu përgjigjur, kur si avokat ai kishte akuzuar gratë për gënjeshtra dhe “po bënte kështu edhe sot”.

Në një gjyq të parë në 2018, Tron u shkarkua nga akuza e përdhunimit dhe sulmit seksual i dy vajzave nga personeli në 2007 dhe 2010. Por një gjykim apeli në shkurt të këtij viti mbështeti akuzat e njërës prej tyre dhe burgosi ​​Tron-in.

Pas shpalljes si fajtor në shkurt, bashkia e qytetit lëshoi ​​një deklaratë për shtyp në emër të Tron-it, në të cilën refuzonte të jepte dorëheqjen dhe nga qelia e tij do të “luftonte për të provuar pafajësinë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.