Kroacia konfirmon dhunën ndaj emigrantëve, Greqia premton hetim

Kroacia pranoi të premten se oficerët e saj të policisë kishin marrë pjesë në një goditje të dhunshme të emigrantëve në kufirin me Bosnjë dhe Hercegovinën, ndërsa Greqia premtoi se do të hetonte raportet e veprimeve të ngjashme nga zyrtarët e saj.

Disa media evropiane raportuan këtë javë se zyrtarët grekë dhe kroatë po i tërhiqnin ilegalisht dhe nganjëherë dhunshëm emigrantët. Ekzekutivi i Bashkimit Evropian bëri thirrje për një hetim të enjten.

Shefi i policisë kombëtare të Kroacisë, Nikola Milina, tha se tre policë të përfshirë i përkasin një njësie të ndërhyrjes speciale dhe se tani do të përballen me procedura disiplinore.

“Ne nuk duam që ndonjë incident i tillë të dëmtojë imazhin e policisë kroate dhe punën e mirë që ajo kryen në kontrollin e kufirit dhe luftimin e kontrabandistëve të emigrantëve”, tha ai.

Ministri i Brendshëm i Kroacisë, Davor Bozinovic, deklaroi se hetimi lidhej me një incident në qershor.

Ministri grek i Migracionit, Notis Mitarachi, të premten tha se i kishte thënë komisioneres të Punëve të Brendshme të BE-së, Ylva Johansson, se pretendimet do të hetohen.

“Çdo pretendim i bërë hetohet nga gjyqësori dhe nga auditimi ynë i brendshëm”, u tha ai gazetarëve në një takim të BE-së në Luksemburg.

Johansson më herët tha se vendet e BE-së kishin nevojë të mbronin kufijtë e jashtëm të bllokut, por se ata gjithashtu duhej të respektonin sundimin e ligjit dhe të drejtat themelore.

Sipas ligjit ndërkombëtar dhe asaj të BE-së, emigrantët kanë të drejtë të kërkojnë azil dhe është e ndaluar të dërgohen azilkërkuesit e mundshëm përsëri atje ku jeta ose mirëqenia e tyre mund të jetë në rrezik.

12 ministra të migrimit dhe të brendshëm nga Austria, Danimarka, Greqia dhe vendet e Evropës Lindore i shkruan të enjten Komisionit Evropian, duke bërë thirrje për mjete të reja për të shmangur këtë rritje, në vend që të merreshin me sistemet e mbingarkuara të emigrantëve.

Sipas tyre, migrimi ilegal po përdorej për qëllime politike.

Polonia dhe shtetet e tjera të BE-së, si Lituania dhe Letonia, kanë raportuar rritje të mprehtë të emigrantëve nga vende të tilla, si Afganistani dhe Iraku.

Ata përpiqen të kalojnë kufirin nga Bjellorusia – në atë që Brukseli dhe Varshava thonë se është një formë e luftës hibride nga Minsk-u.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.