Kina po tkurret, në vitin 2035 do të ketë 400 milionë pensione për të paguar

Kina po tkurret edhe më shumë.

Pas kolapsit historik demografik të regjistruar vitin e kaluar, për të dytin vit radhazi po humbet banorë: më pak se 2.08 milionë.

Të dhëna edhe më të këqija për vitin 2023 që sapo ka përfunduar, krahasuar me shifrat e vitit 2022.

Por kjo nuk është krejtësisht e papritur. Rënia që filloi vitin e kaluar ishte e destinuar të vazhdonte.

Një rënie – e shkaktuar nga lindshmëria e ulët dhe një valë vdekjesh nga COVID-i pas përfundimit të papritur të kufizimeve të ashpra – që mund të kenë efekte afatgjata në potencialin e rritjes së vendit.

Pavarësisht stimujve të Partisë, rënia e lindjeve ka vazhduar për dekada: 9.02 milionë foshnja në vitin 2023 krahasuar me 9.56 milionë në vitin 2022.

Dhe lindshmëria ka arritur në nivelin më të ulët historik prej 6.39 lindjesh për një mijë njerëz.

Kurse vdekjet u shtuan: 11.1 milionë, me shkallën e vdekshmërisë që arriti nivelin më të lartë që nga viti 1974 gjatë Revolucionit Kulturor.

Të dhënat e reja shtojnë shqetësimet se perspektivat e rritjes së ekonomisë së dytë më të madhe në botë po rrëshqasin teksa punëtorët dhe konsumatorët tkurren, ndërkohë që rritja e kostove të kujdesit për të moshuarit dhe përfitimeve të pensioneve i tensionojnë qeveritë me borxhe.

Ata mbi të 60-at do të arrijnë në 296.97 milionë në vitin 2023, afërsisht 21.1 për qind e popullsisë totale.

Sipas vlerësimeve, deri në vitin 2035, do të ketë mbi 400 milionë kinezë në moshë pensioni.

Një rënie që shqetëson udhëheqjen komuniste, duke vënë gjithashtu në rrezik ambicien e presidentit Xi Jinping për të kapërcyer SHBA-të.

Një rënie që mund të ketë pasoja afatgjata si për ekonominë kombëtare ashtu edhe për atë globale, duke qenë se vendi është një burim thelbësor për fuqinë punëtore dhe kërkesën që nxit rritjen e Kinës dhe të gjithë botës.

Një mungesë e fuqisë punëtore që do të zvogëlojë gjithashtu të ardhurat e ardhshme tatimore dhe kontributet në një sistem pensionesh tashmë nën presion të madh.

Ëndrra e Xi Jinping për “përtëritje kombëtare” deri në vitin 2049 duhet të përballet me një vend që tashmë po plaket: një plakje që do të reduktojë fuqinë punëtore, duke bërë që kostot e mirëqenies të rriten.

“Wei fu xian lao”, “plakje para se të pasurohesh”: kjo është shprehja që përmbledh mirë frikën e kinezëve.

Për vite me radhë Partia-Shtet është përpjekur të korrigjojë kolapsin demografik dhe rënien e martesave.

Probleme që Perëndimi i njeh mirë, por një tendencë që këtu i ka rrënjët në politikën e një fëmije të ndjekur prej dekadash (e braktisur në vitin 2016) dhe që ka shkaktuar çekuilibrime të frikshme gjinore: sot në Kinë ka 30.97 milionë burra më shumë se gra.

Gratë, të cilat, duke pasur parasysh nivelin e tyre arsimor në rritje, shpesh nuk mendojnë fare të martohen dhe të kenë fëmijë.

Një bombë demografike që duhet gjetur edhe në koston në rritje të arsimit për fëmijët që familjet duhet të mbështesin. Qeveritë vendore po përpiqen me të vërtetë për të stimuluar nivelet e ulëta të lindjeve: ulje taksash, pushime më të gjata të lehonisë dhe subvencione për strehimin.

Reduktimi i mëtejshëm i prirjes për të pasur fëmijë janë papunësia e të rinjve, e cila ka arritur nivele rekord muajt e fundit, pagat e shumë punonjësve të jakës së bardhë që janë ulur dhe kriza në sektorin e pasurive të paluajtshme, e cila është intensifikuar.

Sipas ekspertëve, në vitin 2024 mund të ketë më shumë lindje, pasi është viti i dragoit dhe kinezët i duan dragonjtë.

“Kam frikë se ekspertët do të zhgënjehen. Tani janë bërë supersticiozë”, thuhet në disa nga komentet në mediat sociale.

Në frontin ekonomik, të dhënat e PBB-së të shpallura tashmë në Davos nga kryeministri Li Qiang u konfirmuan: Kina u rrit me 5.2 për qind në vitin 2023.

Ky ritëm, që do ta kishin zili shumica e ekonomive të mëdha, është megjithatë më i ngadalti për Kinën që nga viti 1990, duke përjashtuar periudhën e pandemisë.

Pas gjashtë vitesh zbrazëti, Partia ka publikuar sërish të dhëna për papunësinë e të rinjve: 14.9 për qind.

Paçka se metoda e numërimit tashmë ka ndryshuar dhe nuk merr më parasysh popullsinë studentore.

“Llogaritja e normave të papunësisë për grupmoshat që nuk përfshijnë studentët mund të pasqyrojë më saktë situatën e punësimit të të rinjve që kanë hyrë në shoqëri”, thotë Kang Yi, kreu i Byrosë Kombëtare të Statistikave.

Marrë nga “La Repubblica”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.