Kanalet e Venecias kanë filluar të thahen, paralajmërime thatësirash në Itali

Javët e motit të thatë të dimrit kanë nxitur shqetësimet se Italia mund të përballet me një thatësirë tjetër pas urgjencës së verës së kaluar, kur Alpet morën më pak se gjysmën e sasisë normale të borës.

Lajmi u bë i ditur nga agjencia “Reuters”.

Paralajmërimi erdhi pasi Venecia, ku përmbytjet janë zakonisht shqetësimi më i madh, u përball me baticë jashtëzakonisht të ulët që e bëri të pamundur për gondolat, taksitë e ujit dhe ambulancat të lundronin në disa nga kanalet e saj të famshme.

Problemet në Venecia janë për shkak të një kombinimi të disa faktorëve – mungesa e shiut, presioni i lartë, hëna e plotë dhe rrymat detare.

Lumenjtë dhe liqenet e Italisë po vuajnë nga një mungesë akute e ujit, tha të hënën grupi mjedisor Legambiente, me një fokus të veçantë në veri të vendit.

Po, lumi më i gjatë i Italisë, i cili rrjedh nga Alpet në veriperëndim në detin Adriatik, ka 61 për qind më pak ujë se zakonisht për këtë periudhë të vitit, thuhet në deklaratë.

Korrikun e kaluar, Italia shpalli gjendjen e jashtëzakonshme në zonat përreth Po, të cilat përbëjnë rreth një të tretën e prodhimit bujqësor të vendit dhe që janë goditur nga thatësira më e keqe në 70 vjet.

Niveli i ujit në liqenin Garda në veri të Italisë ka rënë në një nivel të ulët rekord, duke bërë të mundur arritjen e ishullit të vogël San Biagio në liqen nëpërmjet një shtegu të hapur.

Një anticiklon ka mbizotëruar motin në Evropën Perëndimore prej 15 ditësh tashmë, duke sjellë temperatura të buta që shihen zakonisht në fund të pranverës.

Megjithatë, parashikimet e fundit të motit tregojnë se Alpet presin reshje dhe borë shumë të nevojshme në ditët në vijim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.