Kreu i Çeçenisë, Ramzan Kadyrov, tha se është gati të zëvendësojë mercenarët e “Wagner”, të cilët pretendohet se duan të largohen nga Bakhmuti, me Kadirovitë.
Bakhmut është pika më e nxehtë e frontit, ku vdesin qindra militantë.
Udhëheqësi i “Wagner”, Yevgeny Prigozhin akuzoi më herët udhëheqjen ushtarake të Rusisë dhe tregoi trupat e gjakosur të pushtuesve që po vdisnin nga mungesa e municionit.
“Nëse vëllai i madh Prigozhin dhe Wagner largohen (nga Bakhmut), atëherë Shtabi i Përgjithshëm do të humbasë një njësi luftarake me përvojë, dhe vëllai i tij më i vogël Kadyrov dhe Akhmat do të zënë vendin e tij në Bakhmut”, shkruan Kadyrov në kanalin e tij Telegram.
“Nëse skenari është akoma i tillë, atëherë luftëtarët tanë janë gati të avancojnë dhe të pushtojnë qytetin. Është çështje orësh”, vijon kreu i Çeçenisë.
Kadyrov iu drejtua udhëheqësit të “Wagner” Yevgeny Prigozhin, Ministrit të Mbrojtjes së Federatës Ruse Sergei Shoigu dhe Shefit të Shtabit të Përgjithshëm të Forcave të Armatosura Ruse Valery Gerasimov dhe u bëri thirrje atyre të pajtohen.
Sipas tij, grindje të tilla publike demotivojnë forcat dhe shoqërinë ruse.
Ai tha se ishte “i pakënaqur nga deklaratat e Prigozhin” dhe “është dy herë më i pakënaqur që udhëheqja e Ministrisë së Mbrojtjes së Federatës Ruse nuk komenton apo takohet me udhëheqjen e PMC Wagner”.
Kadyrov deklaroi gjithashtu se gjatë bllokadës së Mariupol-it, ai i kërkoi Ministrisë së Mbrojtjes Ruse 5 tanke, por mori vetëm një.
Ai gjithashtu filloi të ankohej për gjendjen e pajisjeve ruse dhe kritikoi Prigozhin, i cili tregoi trupat e mercenarëve të vrarë.
“Është e gabuar të fotografosh trupat e shokëve të rënë për hir të rezonancës publike. Le të mos e bëjmë kurrë këtë”, shkruan Kadyrov.
Themeluesi i “PMC Wagner” Yevgeny Prigozhin, në një letër drejtuar udhëheqjes së Ministrisë së Mbrojtjes së Federatës Ruse, deklaroi se do të tërhiqte mercenarët nga Bakhmut më 10 maj.
Ai pretendon se arsyeja e një hapi të tillë është se Ministria e Mbrojtjes e Federatës Ruse nuk u jep luftëtarëve të tij sasi të mjaftueshme municioni dhe nuk dëshiron që luftëtarët e tij të “dënohen me një vdekje të pakuptimtë” për shkak të kësaj.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
