Juventusi mund të dënohet me zbritjen e pikëve edhe për sezonin e ardhshëm

Juventusi mund të përballet me një tjetër dënim në një gjyq të dytë të FIGC në qershor dhe ka tre skenarë të mundshëm për bardhezinjtë, duke përfshirë zbritjen e pikëve për sezonin 2023/24.

Juventusi u dënua me zbritje të 10 pikëve këtë të hënë, pak minuta para fillimit të ndeshjes së tyre kundër Empoli-t, të cilën e humbën me shifrat 4:1.

Megjithatë, ky nuk është fundi i sagës, pasi bardhezinjtë i pret një provë e re, lidhur me manovrat e pagave, partneritetet me klube të tjera dhe pagesat për agjentët.

Seanca do të zhvillohet më 15 qershor, pas përfundimit të sezonit në Serie A dhe ka dy rezultate të mundshme, siç raporton “Gazzetta dello Sport”.

Juventusi mund të negociojë një marrëveshje për pranimin e fajësisë me Prokurorin e FIGC, duke shpresuar që të marrë një gjobë ose zbritje pikësh, por nëse kërkesa refuzohet, atëherë gjyqi do të vazhdojë rregullisht.

Juve, ora fronte stipendi: rischio altra penalizzazione, patteggiamento o processo? https://t.co/DTYdAb56D6

— La Gazzetta dello Sport (@Gazzetta_it) May 23, 2023

Prokurori i FIGC, Giuseppe Chine, ka akuzuar Juventus-in dhe disa ish-drejtorë për shkelje të nenit 4, paragrafit 1 të Kodit të Drejtësisë Sportive për katër pika: manovrën e pagave për sezonin 2019/20, atë për sezonin 2020/21, marrëveshjet e agjentëve dhe partneritetet me klube të tjera.    `

Nëse gjyqi vazhdon pa marrëveshje midis Chine dhe Juventus-it, të cilat duhet të zgjidhen përpara 15 qershorit, procesi do të jetë i njëjtë me gjyqin e fundit të FIGC, me një seancë dëgjimore dhe një vendim që pritet në fund të ditës.

Sidoqoftë, mbetet për t’u parë nëse një zbritje e mundshme e pikëve do të ishte e vlefshme për sezonin 2022/23, 2023/24 apo edhe për të dy sezonet, duke e penguar Juventus-in të arrijë një vend evropian këtë sezon dhe duke filluar sezonin e ardhshëm me zbritje pikësh.

Një hetim i UEFA-s është gjithashtu në kuadër dhe do të përfundojë gjithashtu në qershor.

“Gazzetta” raportoi të martën se organi qeverisës i futbollit evropian do të ishte gati të negociojë një dënim më të butë për Juventus-in, por vetëm nëse gjigantët e Serisë A braktisin zyrtarisht Superligën.

Çdo ndalim nga garat evropiane do të hynte në fuqi sapo Juventusi të kualifikohet në Ligën e Kampionëve, Ligën e Evropës ose Ligën e Konferencës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.