Joe Biden nuk do të dërgojë avionë luftarakë F-16 në Ukrainë

Presidenti i SHBA-ve, Joe Biden ka përjashtuar mundësinë e dërgimit të avionëve luftarakë F-16 në Ukrainë, pavarësisht thirrjeve të përsëritura nga zyrtarët ukrainas për mbështetje urgjente ajrore.

I pyetur nga një gazetar të hënën nëse SHBA do t’i siguronte avionët, Biden thjesht u përgjigj “jo”.

Komenti i tij vjen një ditë pasi udhëheqësi gjerman përjashtoi gjithashtu dërgimin e avionëve.

Ukraina ka kohë që i ka shtyrë aleatët e saj të dërgojnë avionë luftarakë të avancuar për të ndihmuar Kievin të marrë kontrollin e hapësirës së saj ajrore në luftën e saj të vazhdueshme me Rusinë.

Presidenti ukrainas Volodymyr Zelensky dhe zyrtarët e lartë ushtarakë të vendit thonë se nuk duhet të ketë tabu për një ndihmë të tillë ushtarake – por SHBA dhe partnerët e saj kanë frikë se kjo do të çonte në përshkallëzim të mëtejshëm me një Rusi të armatosur bërthamore.

F-16-të e prodhuar në SHBA do të ishin një përmirësim i rëndësishëm i avionëve luftarakë të epokës sovjetike – kryesisht MiG – që po përdor aktualisht Ukraina, të cilët u bënë përpara se vendi të shpallte pavarësinë nga BRSS në 1991.

Megjithatë, Biden ka kundërshtuar në mënyrë të përsëritur lutjet e Ukrainës për avionët, duke u fokusuar në sigurimin e mbështetjes ushtarake në fusha të tjera.

SHBA njoftoi javën e kaluar se do të furnizonte Kievin me 31 tanke Abrams, duke përmbysur qëndrimin e saj të mëparshëm për këtë çështje. Mbretëria e Bashkuar dhe Gjermania gjithashtu premtuan mbështetje të ngjashme.

Çfarë armësh po i jepen Ukrainës?

Zëvendësministri i Jashtëm ukrainas Andriy Melnyk e mirëpriti atë njoftim, por u kërkoi aleatëve krijimin e një “koalicioni avion luftarak” që do t’i siguronte Ukrainës gjithashtu avionë Eurofighters, Tornados, Rafales francezë dhe avionë suedez Gripen.

Në një intervistë të dielën, kancelari gjerman tha se “dukej e pavlerë” të diskutohej për dërgimin e ndihmës tjetër ushtarake në Ukrainë, kur qeveria e tij sapo ishte zotuar të dërgonte tanke Leopard 2.

Olaf Scholz gjithashtu përsëriti për gazetën gjermane Tagesspiegel se aleanca ushtarake e NATO-s nuk ishte në luftë me Rusinë dhe se ajo “nuk do të lejonte një përshkallëzim të tillë”.

Ndërkohë, presidenti francez Emmanuel Macon tha të hënën se “sipas përkufizimit, asgjë nuk përjashtohet”, duke iu referuar ndihmës ushtarake për Ukrainën. Por ai theksoi se kjo nuk duhet as të ndezë më tej situatën dhe as të kufizojë aftësinë e Francës për të mbrojtur veten.

Ministri ukrainas i Mbrojtjes Oleksii Reznikov ndodhet tani në Paris, ku pritet të diskutojë këtë çështje me zyrtarë të lartë francezë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.