Ish-komandanti Wagner kërkon azil në Norvegji: Të burgosurit përdoren si mish për top

Një ish-komandant i grupit mercenar rus Wagner është arratisur në Norvegji, ku ka kërkuar azil.

Tani, ai mund të bëhet një dëshmitar kyç para gjykatave penale që hetojnë krimet e luftës të kryera nga Rusia.

26-vjeçari Andrey Medvedev ka treguar se ka qenë dëshmitar i vrasjes së luftëtarëve të Wagner në Ukrainë, të akuzuar nga vetë komandantët e tyre për mosbindje ndaj urdhrave.

Ai, pasi u largua nga njësia e tij, kaloi kufirin për në Norvegji afër luginës së Pasvikdalen të premten, ku u arrestua dhe u mbajt nga rojet kufitare.

“Distrikti i Policisë Finnmark mund të konfirmojë se një burrë ka kaluar ilegalisht kufirin rus/norvegjez më 13 janar. Ai u arrestua nga rojet kufitare norvegjeze dhe policia norvegjeze në orën 01:58. Ai ka aplikuar për azil në Norvegji”.

Kështu ka konfirmuar Tarjei Sirma-Tellefsen, shefi i shtabit të policisë së Finnmark, në Norvegjinë veriore.

Medvedev është ushtari i parë i njohur i grupit Wagner që ka dezertuar.

“Të burgosurit përdoren si mish për top. Më caktuan një grup të burgosurish. Në togën time, vetëm tre burra nga 30 mbijetuan”, ka treguar ai më herët.

“Më pas na dhanë më shumë të burgosur dhe shumë prej tyre vdiqën”, ka thënë ai.

Medvedev ka treguar po ashtu se ai dinte për të paktën dhjetë vrasje të ushtarëve të Wagner-it që nuk ishin bindur dhe se ai personalisht kishte qenë dëshmitar i disa ekzekutimeve.

“Komandantët i çuan në një poligon dhe u qëlluan në sy të të gjithëve. Herë pushkatohej një djalë, herë vriteshin çifte”, ka thënë ai.

Kjo bëri që Medvedev të dezertonte.

Ai gjithashtu ka pretenduar se kishte nën komandën e tij Yevgeny Nuzhin, një vrasës i dënuar i rekrutuar nga Wagner, i cili iu dorëzua forcave ukrainase, por më vonë do t’i dorëzohej Rusisë dhe do të ekzekutohej.

“Kisha frikë se fati im mund të ishte i njëjtë me atë të tijin. Kam frikë për jetën time”, ka treguar Medvedev në dhjetor teksa ishte fshehur në Rusi.

Sakaq, Medvedev është i gatshëm të tregojë gjithçka që di për grupin Wagner dhe aktivitetet e tij.

Grupi i të drejtave të njeriut Gulagu.net, që ka qenë në kontakt me Medvedev që nga udhëtimi i tij në Norvegji, ka publikuar një intervistë me Medvedev, në të cilën ai detajoi arratisjen e tij dramatike.

“Kur isha në kufi, dëgjova qentë që lehnin, u ktheva, pashë njerëz me elektrik dore, rreth 150 metra larg, që vraponin në drejtimin tim. Dëgjova dy të shtëna”.

Ndërkohë, avokati norvegjez i Medvedev, Brynjulf ​​Risnes. Ka treguar se ai u ndalua në Oslo, ku u akuzua për hyrje të paligjshme në vend.

Por ai nuk është më në paraburgim, por është në një vend të sigurt teksa çështja e tij po shqyrtohet.

“Nëse ai merr azil në Norvegji, tarifa e hyrjes së paligjshme do të hiqet automatikisht. Ai deklaroi se është i gatshëm të flasë për përvojat e tij në grupin Wagner me njerëzit që po hetojnë krimet e luftës”, ka shtuar avokati.

Nga ana tjetër, njësia e policisë norvegjeze që heton krimet e luftës ka thënë se është e gatshme të flasë me azilkërkuesin rus.

Shërbimi Kombëtar i Hetimit Kriminal i Norvegjisë, i cili merr pjesë në hetimet e krimeve të luftës në Ukrainë me Gjykatën Penale Ndërkombëtare, ka thënë se ishte në kontakt me Medvedev dhe avokatin e tij norvegjez.

Dhe se do ta “marrë atë në pyetje së shpejti”.

Marrë nga “Corriere della Sera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.