Harta e re gjyqësore, demokratët e Alibeajt kërkojnë seancë dëgjimore me institucionet e drejtësisë në Komisionin e Ligjeve

Deputetët e Grupit Parlamentar të Partisë Demokratike, me në krye Enkelejd Alibeaj, të hënën e 13 qershorit kanë kërkuar një seancë dëgjimore me institucionet e drejtësisë në Komisionin për Çështjet Ligjore.

Konkretisht deputetët Dhurata Çupi, Enkelejd Alibeaj, Gazment Bardhi, Saimir Korreshi, Bledion Nallbati, Dashnor Sula, Greta Bardeli dhe Fatmir Mediu në seancë dëgjimore kanë kërkuar të paraqiten në Komision: Këshilli i Lartë Gjyqësor, Këshilli i Lartë i Prokurorisë, Ministria e Drejtësisë, Dhoma Kombëtare e Avokatisë, Avokati i Popullit dhe Komiteti Shqiptar i Helsinkit.

“Deputetët kanë marrë mesazhe të shumta nga qytetarë të ndryshëm që shprehen të shqetësuar lidhur me mbylljen e gjykatave në qytetet e tyre”, shkruhej në kërkesën drejtuar kryetares së këtij Komisioni, Klotilda Bushkas.

Sipas tyre, shqetësuese mbetet situata për banorët që do t’iu duhen të udhëtojnë për kilometra apo orë të tëra për të mbërritur pranë gjykatës kompetente për gjykimin e çështjeve të tyre.

Kujtojmë që, më herët, kreu i PD-së, Sali Berisha, ka dënuar ndarjen e re të kësaj harte gjyqësore.

Po ashtu, edhe kreu i Dhomës së Avokatisë, Maks Haxhia, ka deklaruar se, duke nisur nga dita e martë më 14 qershor, avokatët do t’i bojkotojnë seancat gjyqësore për katër ditë, pasi kundërshtojnë Hartën e re Gjyqësore.

Çfarë ka ndodhur më tej?

Miratimi i Hartës së re Gjyqësore është kthyer po ashtu në një “shkak përplasjeje” mes Dhomës së Avokatëve Penalistë dhe Dhomës së Avokatisë.

Saimir Vishaj, kreu i Avokatëve Penalistë, ka dalë kundër vendimit të Dhomës së Avokatisë, e cila ka kërkuar bojkotim të gjyqeve si protestë kundër Hartës së re Gjyqësore.

Vishaj, nëpërmjet një postimi në median sociale Facebook, shkruan se Dhoma që ai drejton nuk do të bëhet pjesë e grevës.

Kjo pasi, sipas tij, nuk është i qartë objektivi i kësaj greve, pra shkaku lidhur me kundërshtimet e Hartës gjyqësore.

Vishaj shkruan se afati i grevës është shumë i shkurtër dhe se dëmi që mund të shkaktojë në raport me qëllimin e saj është irelevant.

Pse një Harte e re shkaktoi përplasje?

Miratimi i Hartës do të sjellë shkrirjen e dhjetë Gjykatave, duke e çuar kështu numrin total të atyre të Shkallës së Parë nga 22 në 12.

Kjo Hartë e re Gjyqësore parashikon 12 Gjykata të shkallës së parë të juridiksionit të përgjithshëm dhe vetëm një Gjykatë Apeli për juridiksionin e përgjithshëm dhe një për atë administrativ.

Ky veprim ka hasur në kundërshtinë e avokatëve, të cilët e konsiderojnë si skemë të pamundur për të funksionuar.

“Ky proces detyron qytetarin nga Shkodra, Tropoja, Kukësi, Korça, Pogradeci, Berati dhe shumë qytete të tjera të shkojnë nga skajet më të largëta të vendit në mes të Tiranës”, shprehet Lena.

Kështu, sipas tij, qytetarët mund të detyrohen që, përpos shpenzimeve të udhëtimit, të qëndrojnë edhe në Tiranë, nëse kanë një seancë gjyqësore.

Nga ana tjetër, ministri i Drejtësisë, Ulsi Manja, deklaroi se kjo hartë do të afrojë Gjykatat me njeriun, do të rrisë cilësinë dhe do të përdoren më së miri edhe burimet publike.

“Edhe në nivel Apeli, nisur nga lëvizjet demografike, 90% e qytetarëve do të kenë askes në Apelin e Tiranës”, u shpreh ai.

Çfarë do të thotë kjo Hartë?

KLGJ-ja, në bashkëpunim me partnerët ndërkombëtarë, më 8 qershor e ka hartuar këtë projekt, që u dërgua për shqyrtimin e Ministrisë.

Sipas hartimit, Këshilli ka propozuar që nga “22 gjykatat e rretheve gjyqësore me juridiksion të përgjithshëm, gjashtë gjykatat administrative të shkallës së parë dhe gjashtë gjykatat e apelit me juridiksion të përgjithshëm të riorganizohen në 12 gjykata me juridiksion të përgjithshëm dhe dy gjykata administrative në shkallë të parë, dhe një gjykatë apeli”.

Me fjalë të tjera, është kërkuar një ulje e numrit të gjykatave.

Në deklaratë shkruhet se, “Harta e re Gjyqësore do t’i shërbejë optimizimit të burimeve njerëzore dhe financiare, rritjes së eficiencës së gjykatave, përmirësimit të shpejtësisë së gjykimit dhe aksesit në drejtësi të qytetarëve”.

Po ashtu KLGJ-ja e ka cilësuar hartën si çelësin shumë të rëndësishëm për zgjidhjen e sfidave të sistemit gjyqësor, lidhur me ngarkesën e punës, delegimet, aksesin, koston dhe efektshmërinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.